US-i Vietnam anema benokba tenokdangba sentong agiener

Hanoi, May 23 (Agencies): United States-i Vietnam anema tesüiba mapang benokba par linük dang tongpang nung amshitsütsü osettsüset mayoktsü tenokdangba sentong agienba olen ka Vietnam Tir, Tran Dai Quang-i tanü Hombar nü metetdaktsüogo.
Par linük semdangsang, US Tir, Barack Obama den senden ka amenba sülen Obama den aroki osangbener den ajurutepdang Quang-i iba olenji metetdaktsü.
“Mitkar amaliteptsüren alitsü, shishilembatsü aser nübur temang tia junga ayutsü densema, ozü linük anati tanaben sentaktepshia, sabang balala nung amaliteptsü nangzüktepogo,” ta pai ashi.
“Ozü US-i küm 50 tejaklen Vietnam anema benokba tenokdangba sentong agientsü lemtetogo. Tan tenokdangba sentong agienba ajanga Vietnam linükia tarutsü anogotem nung tongpang nung amshitsü osettsüset tetsükdakba kecha meli alizüka par linük kümzüktsü mapatong tajungba kümdaktsütettsü,” ta Obama-ia osang jangjashitsü.
Paisa ashiba agi, US aser Vietnam na tsüngda mangatettep adokba sülen küm 20 tejaklen nungi tenzüka tesendaktep tajungba akümtsü tenzük saka tan sentaktepshiba amabo taoba mapang meinyaki liasü.
Ajisüaka, nübur nem agütsüba temeten anema inyakba onük nungbo par linük ana tsüngda tangasa tangatettep kati marutetba osang ka Obama-i metetdakja liasü.
Obama-i tan Vietnam semdangdang Quang den dollar sen million 16 shi jenjang aketba shishilembatsü tenzüngzüktepa agiogo.
Ano külen, kidangsüa aliba Vietnam linüki bendang linüktem den tesendaktep tajung yangluba maparen pela agizükba aser iba ama tesendaktep tajungba küma yanglushiba ajanga China aser Vietnam na densemba region nung tensa ajungtsü imlaba olen ka China foreign ministry otongdar, Hua Chuying-ia metetdaktsü.
Ajisüaka, US-i tan agienba tongpang nung amshitsü osettsüset alizüktsü tenokdangbaren den sentakba onük nungbo lai kecha memetetdaktsü.