US-i Zarif nem tenokdangba agütsü: Rouhani-i aitsür

Tehran, Luroi/August 01 (Agencies): United States-i Iran foreign minister nem sanction agütsütsü lemtetba ya tanur yimya ka ama lir, ta Iran Tir Hassan Rouhani-i ashi.
Tehran nem khuret tali agütsütsü nükjidong nung Washington-i, Iranian Supreme Leader Ayatollah Ali Khamenei tenüng nung inyaksangshiba asoshi Mohammad Javad Zarif nem tenokdangba agütsür, ta Bodhbarnü sangdong. Khamenei nema US-i tenokdangba agüja lir.
Brehostibarnü television ajanga sangdongba mapang Rouhani-i ashiba agi, “US ya tanaben tanur yimya amshir… Parnoki anogoshi ‘Onoki jelia sentong meyanglui jembishinüner’ ta ashir…aser parnoki foreign minister nem tenokdangba agütsü.”
2015 küm Iran aser alima nung tashi tait linüktem den nuclear tezüngzüktep agiba nungi US taoba küm atsüngzüka ao aser tawa Tehran den yimjung ken o jembitsü benok aser kasa mapang Iran rongsenketsüng nung tenokdangba agütsü aser Iran indang totzü bendang linük nung belena ayokba nunga sashia nokdang.
US-i Zarif tsübur, shibai tawa New York nung foreign media balala den sensaksema liasü, ta Rouhani-i ashi.
Iba mapang US Tir Donald Trump-i nuclear dak sendakba ken o jembitsü ajungshiba asoshi Zarif-i aija liasü aser Washington-i Gulf nung par tembartem dang nok-o-nü yoka Middle East ya apoktsü tensa ka nung lir, ta ashi.
“Asen foreign minister sensaksem parnoki tsübur. Nisung kati osang sangoktsüba aser o jembiba ajanga White House anokshitsü ta jangja jangja sayur,” ta Iran tirisa ashi.
“Asen tsükchir teyarir mali aser parnok dak shisa kaa bilema inyaktsü sempet samaogo,” ta paisa ashi.
May ita nungi tenzüka US aser Iran tsüngta rara adoktsü südi ta tetsübu nung lir, aser iba mapang Gulf nung totzü abenba rong amak, Iran-i US surveillance drone khazüka yok aser US-i tayimtsü amshia Iran amaktsü sentong yanglur mapang tatongi athi.