US-Iran tesendaktep tajungba küma yanglushitettsü: Rouhani

Iran Tir, Hassan Rouhani-i Italy nung tentetba Corriere della Sera osangkaket indang osangbenertem den Tehran yimti nung tanü Brehostibar nü ajurutepa senden amenba noksa nung angur. (Tehran, November 12)

 Tehran, November 12 (Agencies): Alima tashi abenba linüktem aer Iran na tsüngda nuclear tezüngzüktep takok ngua agiba ajanga Tehran aser Washington na tsüngda taoba mapang ama tesendaktep tanaben junga yanglushitettsü ta Iran Tir, Hassan Rouhani-i tanü Brehostibar nü metetdaktsüogo.

Ajisüaka, par linük ana tsüngda tesendaktep tajungba küma yanglushia, linük anaprongla nung embassy tanaben lapokshiba jakdang US-i tamasa Iran dang taidok meshitsü takhangba olen ka pai metetdaktsü.

Tesüiba mapang, 1979 nung US senso 52 tashi Tehran nung tentetba US embassy ki kilung nung tashiyim agi küm 1 dak tema pua ayuba sülen Iran aser US na tsüngda tesendaktep mejungi akümtsü tenzük.

Ano, Iran-i par nuclear sentong kanga sashia tenzükba ajanga par linük ana tsüngda tesendaktepji tamajungba aküm.

“Ozü Iran aser alima tashi abenba lenirtem na tsüngda taküm July ita nuclear tezüngzüktep takok ngua agiba ajanga Tehran o Washington na tsüngda tesendaktep tajungba akümtsü lenmang lapoktsüogo,” ta Rouhani-i Italy nung tentetba Corriere della Sera osangkaket indang osangbener den tanü Tehran yimti nung ajurutepdang metetdaktsü.

“Ajisüaka, US-i tan agiba ama, nuclear tezüngzüktepji mapa küma inyaktsüla. Ano, US-i küm 37 shi aibelenba atema Iran dang taidok meshitsüla,” ta tan mezüngsüa Europe nung tentetba linük semdanger küma tan hopta tatemlen Italy semdangtsü sentong renemsang, Rouhani-i nenshia ashi.

Rouhani-i tan November ita 14-15 nü tashi Italy semdanga Italy lenirtem aser tongti shishilembartem ajuruba den külemi, Catholic tamangba yimsü lenisang, Pope Francis dena ajurutepa senden amentsü sentong renema lir.

Italy semdangba sülen Rouhani-i November 16-17 nü tashi France linüka semdangtsü sentong lir.