US-Israel na tsüngda tesendaktep kanga junga lir: Obama

New York, September 22 (Agencies): US aser Israel na tsüngda tesendaktep kanga junga aliba olen ka US Tir, Barack Obama-i yashi, Bodbar nü sangoktsüogo.
Obama-i Israel Ato Kilonser, Benjamin Netanyahu den tang New York yimti nung temendak United Nations General Assembly tezülen ajurutepa jurila senden ka amenba sülen  iba olenji metetdaktsü.
Tan Netanyahu den ajurutepba ya Obama-i US Tir menden toktsüba jakdang Tir ka ama Netanyahu den tatemsüa ajurur asütsü.
“Israel atema US den tembar tajungba mali,” ta shia, US-i par linük nem dollar sen billion 38 jenjang aketba mitkar teyari tawa agütsüba atema pelaba olen ka Netanyahu-ia lemsatepa liasü.
US-i tawa Israel nem mitkar teyari agütsütsü nangzükbaji Washington-i bendang linük ka nem mitkar teyari tulutiba agütsütsü nangzüker liasü.
“Israel sorkari pei nübur kümzüka ayutsü nung tetsükdakba kecha majurudaktsütsü nükjidong nung ozü US-i teyari agütsütsü nangzükogo,” ta Obama-ia osang jangjashitsü.
Ajisüaka, Israel sorkari tashiyim agi agia aliba West Bank nung ki o jen süa, par nüburtem lidaktsütsü tenzükba ajanga Palestine linük den yimjung tezüngzktep takok ngua magitetba aser iba ajanga alima nem tebilemtsü khuret agütsüba olen ka Obama-i Israel lenisang den benoka liasü.
Obama-i 2009 küm US Tir menden benokdang Israel aser Palestine na tsüngda teti asoshi yimjung nung alitsü tezüngzüktep asangsang nung agidaktsütsü asoshi bendanga agüja inyaktsü nangzüka liasü saka pai tanü tashi iba alizüngji majangzükteti lir.
US densemba alima tashi abenba linüktemi Iran den nuclear tezüngzüktep agitsü onük densema, Obama aser Netanyahu na tsüngda onük balala nung mangatettep aser temulung malemtep adok aka, tenati aniba linük anati maneni tesendaktep junga ayuba osang bushiteta lir.