US-Japan tesendaktepji yimjung tetenzükdak:Trump

Washington, February 11 (Agencies) : US Tir Donald Trump-i security aser rongsenkettsüng tsütsü Japan den amalitepa inyaktsü tenangzükba ka angiogo aser pai iba tesendaktep nem, linük ana aser anasa aliba tesemtem asoshi yimjung aser akanga litetba tetenzükdak, ta tenüng agütsüogo.
Hokolbarnü Trump-i Japan Ato Kilonser Shinzo Abe dak azüloka pa White House nung pelashishia agizükba mapang Trump-i pa den second 19 tashi salem.
Osangbenertemi ashiba agi, US Tir-i kecha atsüapong meli Abe tenüng sangja asang aser Japan defence asoshi America-i inyaktsü belima aliba meraksai lir ta ashi.
“Asen linük ana tesendaktep aser US o Japan nüburtem temba yimtetba ya kanga tarok,” ta Trump-i Abe den külemi osangbenertem den senden amenba mapang ashi.
Tang iba tenangzüktep agiba ajanga item tesendaktep tali tashi taitba akümer, ta pai shisem.
“Japan aser US naprongi defence terenlok asoshi maneni rongsen kanga sashia intoktsü nüngdak. Ano ni na aser nür nüburtem dang US sepaitem agizükba asoshi kanga pelaba lemsateper,” ta Trump-isa ashi.
Abe-ia, linük ana tsüngda rongsenkettsüng aser shishilemba tashi itshitsü kanga nüngdak, ta ashi.
Paisa, “Ni ano US ya tang dang nungi tashi taitba küma aoba aginer,” ta ashi.
Japan Ato Kilonseri Trump dang taküm küm Japan khenbosa semdangtsü jaokba Trump-i agizükogo, ta külem sangdong ka nung ashi.
East China Sea nung aliba asetkongtem koba China nungeri parnok indang asetkong ta ashir, item asetkongtem asoshi Japan aser Beijing na mangatettep adokba mapang US-i Japan maneni kanga nungita yari.
Trump-i, “US-i Japan aser parnok kübok aliba ajak asoshi security agütsüba nung yaritsü mulunga lir,” ta ashi.
Lenir anati Japan nung aliba Senkaku asetkong aser China nung aliba Diaoyu asetkongtem asoshi US-Japan security atema renema ayuba, Article 5 tali tashi itshi, ta sangdong ajangsa ashi.
White House nung ketdangser kati ashiba agi, Ato Kilonser Abe aser pa kinungtsü na nem sempet agütsür amai tena Florida nung aliba Mar-a-Lago Club-i aotsü nüngdakba senotsü ajak Trump-i tenla. Honibarnü iba club nung lenir ana golf asayatsü.