US mitkar züngsemtem Syria-i yoksemtsü: Obama

Hannover, April 25 (Agencies): Syria-i US mitkar timba yoksemtsü onük agizüktsü renemba olen ka US Tir, Barack Obama-i tanü, Hombar nü metetdaktsüogo.

US-i aniba alima teloktep miktartemi nungitba Syria sorkar mitkartemi Islamic State (IS) kiralongrar madak takok ngua rarabaren maneni tajungba kümdaktsütsü nükjidong nung US Special Forces mitkar züngsem 250 shi yoksemtsü asoshi Obama-i tan sentong renemer lir.

“Ozü US mitkar 250 shi Syria-i maneni yoksema IS anema raraba tongpang takok ngudaktsütsü alizüng yua lir,” ta tang Germany semdanga alisang, Obama-i sangoktsü.

Tan Syria-i yoksemtsü renemba mitkartemi IS den tongpangbo meraratsü saka parnoki IS anema raraba tongpang koktettsü mapatong nung tongti shilem agitsü renema lir.

“Ozü US kijai IS anema raraba tongpang mekoktettsü,” ta shia, Europe-ia IS anema rarabaren nung US nungita pusemtsü tajungshiba olen ka Obama-i metetdakja liasü.

IS anema raratsüren nung rongsen teyari agütsütsü aser mitkar züngsemtem yoktsü den sentakba onük benoka jembitsü nükjidong nung Obama-i France, Britain, Germany aser Italy nungi lenirtem dena ajurutepa tanü senden amenba osang jangjaogo.

Ano külen, Germany kübok Hannover nung ayonga agiba industrial technology fair sentonga Obama aser Germany Chancellor, Angela Merkel nati aroki semdanga liasü.

Obama-i tan Germany semdangdang, US aser Germany na densemba transatlantic Trade & Investment Partnership (T-TIP) shishilembatsü tezüngzüktepa takok ngua agitsü terenemshiba agia lir.

T-TIP mapatong ya US aser European Union (EU) nati 2013 küm nungi tenzüka benokba tongti mapatong ka lir.