US Mosque tem dangi Muslim nunger amokmerenba shidi aru

New York, November 27 (Agencies) : Tajemba agi California nung aliba Mosque asem dangi Muslim amangertem amokmerenba shidi tem aruba nung tang US Tir asütsü atema election nung adoker alisang Donald Trump tenüng asangba zülusema liasü, ta osangbenertemi ashi.
Iba shidi tamajung tem ya Long Beach aser Claremont tesemtem den ano San Jose nunga angu.
Council on American-Islamic Relations (CAIR)-i hopta piyong nung aruba, teka agi züluba aser temenüngzükba shiditem menüngzüker yimjak nung prokshiogo, ta CBS News nung metetdaktsü.
Muslim amangertemji tezüdangtsü aser memerük nisungtem lir, aser ibaji merüktettsü anogo tonga arudar, ta shidi tem nungji shia lir
“Tang linük nung yimsüsür tasen ka lir – Tir Dobnald Trump. Pai America lima merüktettsü aser tanaben linük nung sentsü adoktsü. Pai iba mapaji Muslim amangertem dak nungi tenzüktsü. Hitler-i Yihuda nungertem dak inyakba mesüka Trump-i Muslim amangertem dang inyaktsü, ta shidi nungji shia lir.
Iba shidi nung ‘American for A Better Way’ ta sign süa lir.
Iba ama tensa ka nung police talila agüja anüktsüla aser ketdangsertemi teinyaktsü tim inyaktsü nüngdak, ta Council on American-Islamic Relations-i ashi.
“Tekülem ki ajak lendong nungi jenbutsü mechi nung onoki ozüng amertem dang Muslim telok nung lenirtem den amalitepa inyaktsü akhanger,” ta Honibarnü San Francisco nung CAIR, Executive Director, Zahra Billoo-i sangdong ka ajanga metetdaktsü.
Trump-ibo iba ama tatalokba kecha memetet ta ashir, ajisüaka election atemnü nungi tang tashi nung Muslim amangertem, tanak nisungtem, Latin nungertem, immigrants aser LGBTQ nüburtem anema iba mesükba tatalokba 700 dak tema atalokogo.