Moscow, September 02 (Agencies): Ukraine ken o nung ajemdaker United States-i par Russia anema tenokdangba sentong benokshiba maparen nem tapet telangzüba agütsütsü tenangzükba ka Russia-i tanü Bodbar nü metetdaktsüogo.
US-i Russia nunger 29 anema tenokdangba sentong tasen benokshiba osang ka US Federal Register-i sangdongba sülen Kremlin otongdar, Dmitry Peskov-i tanü iba olenji metetdaktsü.
Paisa ashiba agi, US-i tan tenokdangba sentong benokshiba ajanga alima jenjang nung tensa temajungba kümdaktsür lir.
Par Russia anema tan tenokdangba sentong tasen benokshibaji ozüng anemba maparen ka aliba den külemi, yamaji inyakba ajanga par Russia o US na tsüngda tesendaktep tamajungba kümdaktsüba olen ka Russia Foreign Ministry-ia metetdaktsüogo.
“US-i ozü Russia anema tenokdangba sentongtem benokba ajanga par linükia timtem ajurutsü ta angatettsüla kechiyong ozü Russia-ia tapet telangzüba agütsütsü renema lir,” ta ministry-i shiem.
US-i tan tenokdangba sentong benokbapur rong nung Russia nunger tongti gas shishilembar, Gennady Timchenko; Russia nung totzü timba tutetba Rosneft (ROSN.MM) telok aser tongpang nung amshitsü osettsüset yangluba Kalashnikov Concern telok densema aliba osang jangjaogo.
Tan tenokdangba sentong benokbapurtemi Cyprus, Finland, Romania, Switzerland aser Britain nunger nung par shishilembabaren inyakba osanga bushiteta lir.
US nem tapet telangzüba agütsütsü: Russia added by asungba on
View all posts by asungba →
You must be logged in to post a comment Login