US nung alir India nunger Frank Islam nem ‘Pride of India’ senpet agütsü

New York, August 31 (Agencies): American Federation of Muslims of Indian Origin (AFMI)-i India nunger ‘entrepreneur & philanthropist,’ Frank Islam nem tetushi agüja “Pride of India” senpet agütsüogo, ta Hombar nü media ajanga metetdaktsü.

Taküm May ita nung Aligarh Muslim University, India nem US sen 222,000 tenla agütsüsang, Frank Islam nem iba senpet ya Deobar nü New York nung India indang Consul General, Dnyaneshwar M. Mulay-i agüja liasü, ta India New England daily-i ashi.

Islam-i, “Kü nem taonung AFMI ‘Pride of India’ senpet agütsüba ya ni asoshi kanga tetushi tulu aser iba maongka kü nem agütsüba asoshi kanga pelar. Iba den külemi AFMI silver jubilee sentong nung kü dang o jembitsü asoshi asüngdangba atema kanga pelar,” ta ashiba India New England daily ajanga metetdaktsü.

“Ni senpet aika ngudangogo. Ajisüaka iba senpet ya balaka, kechiba süra iba ya kanga dang akümket telok tentet, AFMI nungi silver jubilee küm agütsüba lir,” ta Islam-i ashi.

“Ni iba senpet angüba agi masükümtsü saka tali ang ajemasüngtsü merangtsü,” ta pai shisem.

Azamgarh, Uttar Pradesh nung asoba, arishi küm 63 tain, Islam-i arishi küm 61 tain, Debbie Driesman den kibong aküm.

Pa ya business maparen tulu kanga takok ngua inyakba, timtemertem nem tenla tulu agütsüba aser tanishir tajung ka dang masü saka kaketshisatsü tsütsüa tanishir tajung ka ta züngshir.

FI Invest Group nung tang pa tekolakba lir. 2007 küm pa meyong information technology firm, QSS Group yoker külen pai FI Invest Group tenzüka liasü, ta osang ajanga ashi.

Kennedy Center Board of Trustees, US Institute of Peace, Woodrow Wilson Center aser Brookings Institution, Washington D.C. tentettem nunga pa board züngsem aser advisor ama teinyakdak lir.

Pai kaketa ana tashi zülua lir; ka 2003 küm züluba “Working the Pivot Points: To Make America Work Again” aser tanabubaji 2010 küm züluba “Renewing the American Dream: A Citizen’s Guide for Restoring Our Competitive Advantage.”

Pai Aligarh Muslim University (AMU) nem tenla agütsüba sen jagi tetsü, Qumran Nisan bilemteta tetsürtem atema technical college ka lapoktsü.

Taoba mapang iba senpet angurtemji Javed Akhtar aser tesüiba mapang India nung union minister of minority affairs, Rehman Khan na lir.

AFMI ya America nung alir India nunger Muslim amangertemi 1989 küm tentetba lir aser parnok August 29, 2015 nü silver jubilee mongogo.