US nung alir India nunger ka dak injang akha

Washington, March 05 (Agencies) : Washington State, US nung nisung ka tejak semoktsü semer arua India nunger (sikh) ka dang ‘Nür limai meyipa oang’ ta shir injang agi akha.
Ketdangsertem aser osangbenertemi ano tenüng majangjai aliba Sikh nungbaji tia kaa mesüi lir. Iba lendong ya Hokolbar aonung atalok.
Iba dang tama Brihostibarnü Lancaster, South Carolina nung alir India nunger Harnish Patel aser February 22, 2017 anogo nung Olathe, Kansas nung alir Srinivas Kuchibhotla na injang agisa khaset.
Ano India nungersa ka Olathe, Kansas nung alir, Alok Madasani daka injang agi akha ajisüaka pa-a tia ka kümzüka lir.
Hokolbarnü atalokba lendong nung, arishi küm 39 tain sangji Kent city nung par kima pa indang gari tera yanglushia aliba mapang temesüng nisungsang jagi arua injang khaloktsü, ta iba tesem nung aliba police temi ashi.
“Onoki iba tatalokba nung bushisüngdang asütsü tenzükogo aser onoki iba tatalokba ya kanga shishia agir,” ta Honibarnü Kent Police Chief Ken Thomas-i osangbenertem dang ashi.
Iba tatalokba ya tenük merem ajanga atalokba lir aser iba asoshi bushisüngdangtsü atema police temi Federal Bureau of Investigation (FBI) teyari dena meshiogo, ta TV osangtem nung metetdaktsü.
Kent City Council nungi candidate, Satwinder Kaur-i, tang teben yirur alisangi pa tenüng memetetdaktsüi liang ta mepishiba ajanga lokti ka ama pai mepishiba nem akümtsübu agüja pa tenüng memetetdaktsür, ta Facebook ajanga ashi.
Sikh telok nung lenir Jasmit Singh-i, yirur alisangji tangbo joko mozü kidang nungi adokogo, ta metetdaktsü.
“Pa aser par kibong kanga aoksar lir. Ya kechiba atalok ibaji onoki mejangjateter,” ta Singh-i ashi.
Kent city ya Seattle nungi kilometre 30 shi pilar House of Representatives nung züngsem, India tsür Pramila Jayapal’er ki anasa lir.
Jayapal-i, “Iba lendong atalokba sülen yiru aliba kibong aser Sikh telok atema kanga shishia bilemtsür. Ibai tenük merem ken o amai bushisüngdangtsü,” ta tweet asü.
2015 küm Kent nung Hindu tekülem ki, Sanatan Dharma Temple maka iba ki indang kijiba tem raksatsür jara nung ‘Tsübuang’ ta zülua yutsür liasü. Ano iba sülen Bothell tesem nunga Hindu temple sa ka amak.