US nung ano India nunger ka kahset

New Delhi/Washington, March 04 (Agencies): Tawa United States, Kansas nung India nunger Engineer ka kahsetba sülen anogo ishika tsüngda ano arishi küm 43 tain India nunger ka US, South Carolina nung kahsetogo.
Arishi küm 43 tain, Harnish Patel ya Lancaster County, South Carolina nung convenience store ka kibur liasü, aser Brihostibarnü ayaterm nung par ki anasa pa tasümang angu; pa dak injang zübo liasü, ta Coroner aser police ketdangsertemi ashi.
Patel store shibanger par kileni aodang kari kahset südi. Pa indang store ji par kidang nungi kilometer 6 shi dang pilar lir, ta osang ka ajanga ashi.
Pai store ji shibangba sülen minute 10 tsüngda pa kahset, ta police-i ashi.
Lancaster County police dangi aonung 11:33 ako meta iba osang arua liasü.
Sheriff Barry Faile-i ashiba agi, Patel ya India nunger asübayong kahset masü südi, ta ashi.
Patel’er store nung mapang shia shishir nisung ka tenüng agi, Nicole Jones-i, “Shibai pa dak yamaji inyaktsüa ta bilem, pai ajak den jungtepa lir,” ta ashi.
“Nü ket nung sen melira pai nü nem chiyungtsü angati chidaktsütsü,” ta Jones-isa ashi.
Ano par kiyonger, Sadler-i, “Ozü tanurtem pai repranga intet, ibayongji ni temelung shiranger. Mezüng anogo nungi pa dak jangratemtsüka liasü. Pa kahsetbaji ni mangateter,” ta ashi.
Ano ABC store kibur aser Patel tembar, Dilipkumar Gajjar-i ashiba agi, Patel-i par kibong tajungba yangertettsü atema iba linüki aru, ta ashi.
Anogo ishika jakdang Kansas nunga India nunger Engineer arishi küm 32, Srinivas Kuchibhotla US Navy nungi anizüngzüker alir, Adam Purinton-i kahseta liasü.
US Tir, Donald Trump-i iba tatalokba aija liasü, iba den külemi pai, iba ya America nunger ajak longjemer aitsür, ta metetdakja liasü.