US nung I-Day parade nung nisung 38,000 shi aden

Washington, August 15 (Agencies): Edison, United States of America nung India nunger nüjiso ngur küm 69 ajungba benjungmung tenüng nung parade akadang India nunger nüngtugu nisung aika dena ajak agi nisüng 38,000 shi-i shilem agiogo, ta media ajanga metetdaktsü.
Iba anogo bilemtetmung ya tan agi New Jersey, US nung 11 ben buba amungerba lir aser iba sentong nung band party tem sülen shilem agia anidakertem tarensenji kilometre ana junga liasü. Iba parade ya Edison nungi tenzük aser Woodbridge jila anasa aliba India Square nung tembanga liasü, ta India West osang ajanga metetdaktsü.
Iba sentong nung adener India nungi nüngtugu nisungtemji; Richa Anirudh, Bollywood actresses Avani Modi, Prachee Shah, Madalsa Sherma, Sameksha Singh aser Sujata Mehta nunger liasü.
Kasa sentong nung New Jersey nung aliba lokti tentet balala nungia nisung 100 dak tema dena liasü. Iba sentong nung nisung 110-i Band ani aser tsüngsanger telok balalai shilem tajung agia liasü.
Iba parade nung shilem agiba mapang yimtem yimsüsürtem telokji Edison Mayor Tom Lankey aser Woodbridge Mayor John McCormac nati ania liasü.
Edison ya Middlesex county, New Jersey nung lir aser iba tesem nung India nunger senso noklang nung shilem 12.93 junga lir.