US nung India nunger tepsetba ajanga aoksar: Sushma Swaraj

New Delhi, February 24 (Agencies): Hokolbarnü External affairs minister, Sushma Swaraj-i, Kansas (US) nung India nunger Engineer ka tepsetba aser ana yirutsüba sülen India nunger ketdangser ana Kansas-i yokogo, ta metetdaktsü.
America nunger tebur kati India nungertem dangji, ‘ozü linük toktsür oang’ ta shia injang kahloktsü, ta osang angazüker.
“US nung India nunger tepsetba ajanga aoksar. Ni US nung aliba Indian ambassador, Navtej Sarna den jembiogo. Pai kü dang Indian Embassy ketdangser ana Kansas-i yokogo ta metetdaktsü,” ta Sushma Swaraj-i tanü twitter ajanga metetdaktsü.
Bodhbar aonung tesü injang yokdang Garmin headquarters, Olathe nung inyaker arishi küm 32, Srinivas Kuchibhotla kahset aser India nunger ka den par medemer, Alok Madasani yirua hospital ka nung yaridar.
Iba tatalokba sülen ghonda pongu lir Brihostibar anepdang tai tonglokja alisang, arishi küm 51, Adam Purinton ji puogo.
Osangkakettem ajanga ashiba agi, iba nisungba jagi India nungertem dangji ‘ozü linük toktsür osang’ ta arrloktsü.
Tesülen navy nung anisüngzüker alisang, Purinton jagi Clinton, Missouri nung nisung ka dang, pai Middle East nung alir ana kahset, ta ashi.
Iba tatalokba nung pa aitsüogo, aser pa bail nung chioktsüsa süra US sen million 2 agütsür ang chioktsü.