US nung kaketshirtemi anir lokti sentong tulu ayongzüker

Washington, Metsüremi 24 (Agencies) : Florida high school nung nisung aika tepsetba agi ajungmesor Küptoknü (par mapang) United States tesem balala nung America nunger meyirijang aika yimdong nung adenshir longkak aittsü sentong tulu renema lir.
Kaketshirtemi “March For Our Lives” omen nung ajemdaker ayongzükba lokti sentongji tzüyimküm külen nungi külen tashi akatsü aser sentong tulutibaji US Capitol anasa Washington nung agitsü sentong renema lir.
Parnok asoshi iba putu nungbo prangbong amshyim azüoktsü atema longkak aitba sentong ibai tulutiba asütsü ta bilemdagi.
“Tanurtemi anir iba lokti sentongji ayongzüker,” ta Connecticut nung Democratic Senator, Chris Murphy-i metetdaktsü; idakji (Connecticut) Sandy Hook Elementary School nung 2012 küm December ita nung arishi küm trok nungi tenet tsüngda tanur 20 tepset.
Parkland, Florida nung taoba February 14 nü arishi küm 19 tain kati Marjory Stoneman Douglas High School nung nisung17 kaset aser tang idakji azüngba kaketshirtemi ajungmesoa iba lokti sentong tulu ayongzüker.
Parnoki US nung ozüng yanglurtem dang assault rifles nüburtem dang mayoktsü aser prangpong ayokdang kanga junga tendangerang ayoktsü atema takhangba agüja arudagi.
Iba lokti sentong ayongertemi ashiba agi, #NeverAgain, omen nung ajemdaker linük tesem balala nung yamala sentong (marches) 800 ayongzükogo aser tang Washington nung akatsü aliba sentong kija nunga tajemjba agi nisung 500,000 bosa adenshitsü südi ta asadangteta lir.