US nung kari Telangana nungi lanur ka kahset

New Delhi, February 12 (Agencies): United States, California nung Telangana nungi arishi küm 27 lanur, V. Vamshi Reddy pa aliba ki anasa kahsetogo, ta osang ka ajanga metetdaktsü. Pa mang nungji injang zübo liasü.
Par kibongji Telangana, Warangal Urban district nung lir.
Reddy’er medemertemi phone ajanga par kinüngertem dang iba tatalokba osang metetdaktsü. Tang tashi nungbo osang tejangja memetet.
Reddy ya 2015 küm US-i oa liasü, aser tawa MS in Computer Science tembangba sülen mapa tebushidak liasü, ta osang angazüker.
Iba osang angazükba sülen par tsüraburtem suchia ao. Reddy ya kijasor liasü, ta kiyonger kati ashi.
Iba dak sentakba nung par kibongi Telangana sorkar dang pa tasümang bener arutsü atema yaridaktsüner ta mepishiogo.
Ano tanga osang ka ajanga ashiba agi, injang ola angashiba sülen police iba tesemji atong. Reddy indang gari den sen auyatsü atema tanak nisung kati pa kahset südi ta police-i melung malemer.
Reddy ya 2014 küm Yadadri district kübok Bhongir nung aliba Vathsalya Institute of Science & Technology nung B Tech renema liasü. Tawa pa US nung MS renemba sülen US nung aliba departmental store ka nung khenpiga atema mapa inyaka liasü.