US nung Modi aser Sharif na tsüngda senden mamentsü

New Delhi/New York, September 24 (Agencies): United States nung India Ato kilonser Narendra Modi aser Pakistan Ato kilonser Nawaz Sharif na senden mamentsü, ta ketdangsertemi ashi.
India aser Pakistan Ato kilonser naprongla UN General Assembly nung adentsü.
Tanü New York nung osangbenertem den jembidang Ministry of External Affairs otongdar Vikas Swarup-i, “Tang tashi nungbo kecha mali, linük ana tsüngda senden amentsü sentong mali,” ta ashi.
Modi aser Sharif naprong yimti nung aliba hotel kasa, Waldorf Astoria nung anenzüktsü.
Tasüngdangba ka langzüdang Swarup-i, “Memerangtsü (lenir ana chitepa ajurutep yonga mepaitoktsü). Salemtepra ibaji nenoki angutsü,” ta ashi.
Sharif asüng nikongdang New York atongtsü.
September 25 nü UN Secretary General Ban Ki-moon-i ketdangsüba Sustainable Development Summit nung Ato kilonser Modi-i jembitsü aser September 27 nü Sharif-i high-level senden ka nung jembitsü sentong lir.
September 26 aser 27 nü Modi California nung alitsü aser September 28 nü New York-i meyipa aotsü, iba anogo nung pai US Tir Barack Obama ajurutsü aser UN Headquarters nung high-level Peacekeeping Summit nung adentsü.
Iba senden nungji Sharif-a adentsü asünungji India aser Pakistan lenir naprong- Modi aser Sharif na tejak chitepa ajuruteptsüa akok.
September 28 aonung tesü mesüra September 29 anepdang yakta Modi India-i meyipa arutsü saka Sharif bo yimti nungsa alitsü.