US nung Muslim telok kati Mobile App ka yanglu

June 25, 2017 (Agencies): Mushim pur anema ozüng alema inyakba maparentem asadangtsü asoshi Unitet States nung Council on American-Islamic Relations (CAIR)-i mobile app ka amenokogo. Iba app nung parnok bendanga mezüngmeshiba mesera parnok anema ozüng alema inyakba maparen tem osang agütsütettsü.
Taoba küm U.S nung Muslim nungertem anema inyakba dang nungi shilem 44 agi timba akümba sülen ita ka lir parnoki ‘Making Democracy Work for Everyone app’ ya amenok. CAIR-i parnok anema inyakba maparen 260 angashia aliba ya shilem tila ka dang ta angazükba sülen iba app ya nüngdak ta angateta amenok aser iba nung osang aika arutsü nükjidong nung parnoki amenok.
Iba application ajanga tamshirtemi parnok anema inyakba maparentem rasaa ashitsü asoshi maongka agütsür koba CAIR staff-i bushisüngdangtsü. Osang agütsübatem tamangba yimsü dak sendakba asünungbo parnoki bendena ayutsü aser tatalokba karbo ozüng alema inyakba maparen süra police tem nem osang agütsütsü.
Iba app ajanga U.S. Constitution nung parnok temeden agüja alibatem dak sendakba nung shisatsü agütsür aser Washington nung CAIR national headquarter, aser linük tesem balala nung parnok indang headquarter tem indang contact number tem agüja lir.
Iba telok-i ngutetba agi Donald Trump election nung toktepba mapang aser pa takokba anguba sülen iba amala maparen ya tali kümogo.
U.S nung iba amala telok tentetba ya tang mezüng masü. 2012 küm Sikh Coalition Organization-ia iba amala mesükba app ka amenoka liasü.