US nung PM Modi-i süoshi 16 ben melen: Rahul Gandhi

Patna, October 07 (Agencies): Congress tatong Tir, Rahul Gandhi-i NDA sorkar aija ‘suit asemba sorkar’ ta jembia aruba sülen tanü pai, tawa Ato kilonser Narendra Modi-i US semdangba mapang süoshi 16 ben tashi melenba aija jembiogo.
Taruba hopta Bihar nung assembly election tenzüktsü lia Bihar nung nüboyim sentong ka nung jembidang Rahul-i, “Pai suit ka asemtsü, iba sülen tanga ka asemtsü, iba sülen wakong sentsü süoshi asemtsü, iba sülen tanen, iba sülen anüng sentsü aser temeremso asemtsü. Tawa pai US semdangba mapang Modi-i sentong balala nung süoshi 16 tashi asem,” ta ashi.
Bihar nung Congress-i teloktep party- Janata Dal United aser Lalu Prasad’er party, Rashtriya Janata Dal den senteper Ato kilonser Modi’er party, BJP den tokteptsü.
Election tenzüksü anogo pezü nü dang lia senior Congress lenir Rahul-i tanü Bihar nung nüboyim sentong asem nung jembiogo.
Ajisüaka par teloktep nungi JD(U) tongti Nitish Kumar aser Lalu Prasad nungeri pa den sabang ka nungi lemsatepa mejembi.
Tanü Rahul Gandhi-i, “Nenoki Nitish-i (Bihar Chief Minister Nitish Kumar) süoshi temesüng asemba dak alaka danga sentsü asemba meteter ma (?)” ta ashi.
“Külen pei nüburtem semdanger Nitish lir, ano külen bendang linüktem ang semdanger Modi lir. Ni Modi-i aluyimer ka, aayanger ka mesüra mapa mangur asangur ka den külemi tangokba noksa kata mengudang,” ta Rahul-isa ashi