US nung senzüsemponger nokdangba ozüng tesashiba akümtsü

Washington, June 05 (Agencies): Taoba mapang linük eshika nungi US-i aittsü nokdangba temzüng yanglua aliba anu meneni US tir, Donald Trump-i iba ozüng tesashiba kümdaktsütsü shiogo.
US tir-i tanep Twitter nung sangdongba agi, United States lendong timtem nungi kümzüktsü mechi senzüsemponger aruba tem kanga junga mita repranger, ta zülutsü.
“Supreme Court nem political tsütsü nungi shidak ta bilemer agütsüba ya masü saka Travel Ban chichiba nung aliba ama Justice Department-i inyaktsüla asü,” ta Trump-i zülutsü.
“Linük kümzüka ayutsü mechi sentong ajak nung nisungtem US-i aruba kanga kümdanga mita repranger. Court aser yimden yimsüsüba ya tenüshi lir!” ta US tir-i pa indang Twitter nung zülutsü.
Trump administration-i court dang jungjunga shisadangtsü asoshi ‘petition’ zülua aliba nem American Civil Liberties Union-i June 12 tashi nung telangzüba agütsütsü asoshi Supreme Court-i Hokulbarnü totuyuba agütsü.
Iba telangzüba agütsüba sülen ang iba ken o agitsü magitsü telemtetba high court-i agütsütsü.
Muslim kin timba aliba linük trok nungi senzüsempongertem US linüki maitdaktsütsü asoshi taoba mapang Trump administration-i tenokdangba agüja aliba tanaben inyaktsü asoshi court dang asüngdanger anogo ka süiba sülen iba totuyuba ya agütsü.
Executive order amshia Trump-i January nung linük tenet nungi nüburtem US-i anogo 90 tashi maittsü aser linük nung refugee sentongtem anogo 120 atema anena atatsü asoshi tenokdangba agütsü, saka iba totuyuba ya court ajanga nokdang.
Senzüsemponger nokdangtsü ya nüngdaker aser iba sentong ya reprangshia ozüng tasen ka yanglushitsüla, ta US sorkar ketdangsertemi ashi.
Federal judge temi ashiba nung lirumedema kümdaktsütsü nükjitong nung iba ‘executive order’ ya March ita tera melenshi. Iba mapang US-i Iraq nüburtem aittsü nokdanga aliba agien aser Syria refugee tem kodanga US-i maittsü tenokdangba agüja aliba agien.
Iba totuyuba ya nisung temeden asoshi nokdaker aser US nung Democrats densema nisung aikati aitsü.
“Nüburtem, obendanger aser court ajanga parnoki molungba jembitsü, saka asenoki kechi nüngdaker, aji ni ashir, TRAVEL BAN!” ta Trump-isa ashi.