US nung soseta asür shilem 24 agi timba kümogo

Washington, April 22 (Agencies) : United States of America (USA) nung 1999 aser 2014 tsüngda nung soseta asürtem noklang nung shilem 24 agi timba kümogo aser America nunger nisung ter asüba rongnung kabo soseta asüba alir, ta Hokolbarnü Centers of Disease Control & Prevention (CDC) sangdong ka ajanga metetdaktsü.
Küm 15 sülen linük nung soseta asür kanga züina kümogo. Balakata tesüiba küm tenet ser tesadang nung soseta asür timba aküm, ta Efe osang ajanga metetdaktsü.
Ano 2015 küm tesadanglen nungi soseta asür kangasa züina aküm, ta CDC-i putetogo.
Soseta asürtem rongnung tanur, tain, tetsür aser tebur ajak dena lir. Oda arishi küm 75 dang tainbatem ang soseta asüba tesüiba mapangtem dang nung kangasa tajemba kümogo.
Soseta asür rongnung arishi küm 45 nungi 64 tsüngda alirtem timba lir.
2014 kümbo arishi küm 45 nungi 64 tsüngda alirtem tetsür aser tebur nisung 100,000 shia nungi nisung 30 shi soseta asüba puteta lir.
1999 küma kasa züngar nungi tebur nisung 100,000 shia nungi 21 aser tetsüra nisung 100,000 shi nungi nisung trok soseta asü.
1999 aser 2014 tsüngda tanur, tain longong aser lanurtem rongnung soseta asüba tanga mapang dang nungi timba liasü.