US nung tesempa agi India nunger anema inyakba süoki ia agir: Rajnath

New Delhi, March 09 (Agencies): US nung tesempa agi India nunger anema inyakbaji India-i süoki ia agir, aser taruba hopta Parliament nung iba onük nung sangdong ka agutsütsü, ta tanü Union Home Minister, Rajnath Singh-i metetdaktsü.
Tawa US nung tesempa agi India nunger ana tepsetogo, aser Lok Sabha nung Question Hour mapang opposition party züngsemtemi iba onük süokba sülen Singh-i, sorkari iba onük süoki ia agir, ta metetdaktsü.
Parliamentary affairs minister, Ananth Kumar-ia, US nung tatalokbatemji sorkari süoki ia agir, ta ashi.
Tanü senden tenzükli asürtem- taoba mapang züngsem pezü bilemtet, iba sülen opposition züngsemtemi US nung India nunger anema inyakba densema onük aika benoka liasü.
AIADMK züngsemtemia Sri Lanka Navy temi Tamil nunger angopurtem dak akhaba onük benoka longkak aita liasü.
Lok Sabha Speaker, Sumitra Mahajan-i parnok dang, Zero Hour mapang iba onükji benoktsü akok, ta ashiba sülen ang parnoki longkak aitba anen.
Senden nung taoba mapang Lok Sabha Speaker, Rabi Ray densema asür züngsem pezü nem akhüm agüja liasü.
Tangar züngsem asemji Jambuwant Dhote, P Shiv Shanker aser Syed Shahabuddin nunger liasü.