US nungi Cuba nunger 680 meyipa yokogo

Washington, February 18 (Agencies) : Taoba mapang US Tir Barack Obama-i tenzüka yutsüba, immigration policy, “wet foot, dry foot” tembangba sülen US nung ozüng alema arua aliba Cuba nunger migrant tem parnok nisung 680 tashi linük nungi meyipa yokogo, ta Honibarnü osang ajanga metetdaktsü.
Taküm January 12 nü nungi US immigration policy mapa küma aoba sülen
Cuba nunger migrant tem parnok ajak agi nisung 979 par kidanger linüktem nungi par linüki meyipa ogo, ta osangbenertemi ashi.
Tang tashi nung Cuba nunger 115 tashi US nungi ogo aser Mexico nungia parnok nisung 246 meyipa yokogo.
Tamalen mela aliba temzüng kübok Cuba nunger visa malir dena US nung arua litettsü temeden agüja liasü. Cuba nunger atema iba US immigration inyakyim ya ita 22 tashi benshia aruogo.
Tang inyakyim tasenba arur külen Cuba nunger meyirjang aika Central America aser Caribbean tesem nung US atongtsü asoshi nungdena lir.
US Tir Donald Trump-i iba inyakyim tasenba atema ano sangdong kecha magütsü saka pai, ozü administration-i Cuba den inyakyim melenshiba yimya kanga junga reprangshidar, ta ashi.
Küm shia Cuba nunger nisung 20,000 nem visa agütsür ozüng kübok linüki aitdaktsütsü US-i tenangzükba agüja lir.