US o Bangladesh nati aroki lungjemer kiralongrar anema raratsü nangzükteper

US Secretary of State, John Kerry (Abelen) aser Bangladesh Ato Kilonser, Sheikh Hasina nati Bangladesh yimtiba, Dhaka nung ajurutepa senden amendang agiba noksa ka yangi angur. (Dhaka, August 29)
US Secretary of State, John Kerry (Abelen) aser Bangladesh Ato Kilonser, Sheikh Hasina nati Bangladesh yimtiba, Dhaka nung ajurutepa senden amendang agiba noksa ka yangi angur. (Dhaka, August 29)

Dhaka, August 29 (Agencies): US aser Bangladesh linük nati aroki lungjemer kiralongrar anema raratsü tezüngzüktep ka tanü, Hombar nü agiogo.
“Kiralongrar anema takok ngua raratsü nükjidong nung ozü linük ana tsüngda kiralongrar den sentakba miim osangtsüsang lemsateptsü aser ozü mitkar rong nung amalitep alitsü tezüngzüktep agiogo,” ta US Secretary of State, John Kerry-i metetdaktsü.
Kerry-i Bangladesh yimtiba, Dhaka nung Bangladesh Ato Kilonser, Sheikh Hasina den senden ka amenba sülen iba olenji metetdaktsü.
“Iraq aser Syria na nung tesep tentetba Islamic State (IS) kiralongrar telok den sentaktepa alir telok 8 tashi aliba osang bushitetogo aser item rong nung telok ka South Asia nung tesep tenteta lir,” ta pai ashi.
“Bangladesh nunga IS telok den sentaktepa alir kiralongrartemi tesep tenteta aliba osang bushitetogo,” ta pai shisem.
“Kiralongrar anema raratsüren nung ozü US den amalitepa inyaktsü jangraba olen ka Bangladesh lenila, Hasina-ia metetdaktsüogo,” ta Kerry-i lemsatep.
South Asia nung tentetba Bangladesh linüki taoba July ita 1 nü lendong ajurua, bendanger nisung 17 tashi densema, ajak agi nisung 20 shi asüba atema sasaba olen lemsatepba den külemi, par US linüki kiralongrar anema raratsü nung Bangladesh sorkar maneni nungita yaritsü tenangzükba olen ka Kerry-i tanü metetdaktsü.
Kerry-i tanü Hasina den ajurutepba sülen tanü nikongtsütsü US Embassy semdangba den külemi, Bangladesh Opposition lenila, Bangladesh National Party (BNP) yimtenren telok lenila, Khaleda Zia dena ajurutepa senden amenba osang jangjaogo.
Par linük anati aroki lungjemer kiralongrar anema raratsü tezüngzüktep agiba den külemi, Bangladesh linük nung rongsenren jenjanga tajungba kümdaktsütsü maparen nung US-i Bangladesh linük nungita yaritsü asoshi Kerry-i nangzükba osanga angazükogo.

You must be logged in to post a comment Login