US o Brazil nati Zika virus anema aroki raratsü nangzükteper

Washington, January 30 (Agencies): United States Tir, Barack Obama aser Brazil Tir, Dilma Rouseff nati aroki lungjemer tang North aser South America na nung kanga sashia poktetba Zika virus anema raratsü tezüngzüktep ka aiogo.
“Ozü Tir, Obama aser Brazil Tir, Rouseff nati yashi, Hokolbar nü telephone ajanga jembiba sülen Zika mesen den sentakba osangtsüsang tali meteta akümtsü, iba meseni adoktsüba tashidak aneptsütsü mozü bushitsü aser iba mesen azüoka samatsütsü tasa aser lenmangtem bushitsü maparen aroki lungjemer inyaktsü nangzüktepogo,” ta White House-i osang jangjashitsü.
Alima tesem ajunga nungi nisung meyirijang jenti taküm asayatsü ayongba Olympic Games nung shilem agitsü asoshi Brazil bushia aotsü renemshia aliba yong tan Zika mesen den sentakba tashidak Americas nung talisa, Brazil nung kanga sashia poktetba osang angazüka alima ajungai tebilemtsü khuret benoktsü tenzüka lir.
“Nisung timbaka atema Zika virus ya lendong aketba tashidak ka makümer. Iba meseni yimra mesükba timtem agütsür saka tepok nung alir tanurtem nembo microcephaly ta ajaba tashidak tulu bener arutsür,” ta Centers for Disease Control & Prevention nung inyaker, Dr. Beth Bell-i metetdaktsü.
Zika meseni Brazil nung kinü tanur 4000 shi nem microcephaly ta ajaba kinu tanur indang tekolak temang nem meputep iladaktsüba aser parnok tekolok mejungi kümdaktsüba timtem bener arutsüba osang tanü tashi nung bushiteta lir.