US o Britain nati Syria tensa tamajungba kümdaktsütsü akok: Russia

United Nations, September 26 (Agencies): US aser Britain ketdangsertemi United Nations (UN) nung o mekümdangi jembiba ajangaSyria nung tensa tamajungba kümdaktsütsü akok ta Russia-i tanü, Hombar nü metetdaktsüogo.

“Syria nung adokba mangatettepbaren bentetja, par linük nung yimtenren tebentetbaren lidaktsütsü asoshi ozü Russia-i mulunga lir.Ajisüaka, US aser Britain envoy-temi UN nung o mekümdangi jembiba ajanga Syria tensaji tang dang nungi tamajungba kümdaktsütsü akok,” ta Russia Tir, Vladimir Putin’er otongdar, Dmitry Peskov-i nenshia ashi.

Syria aser Russia mitkartemi par jet tayimtsü amshia kanga sashia amakdak, Syria sorkar anemertemi agia aliba yimti, Aleppo nung lendong taoba mapang nungi kanga agi tesashiba atalokba den sentakba rongdak senden ka UN Security Council (UNSC)-i amenba sülen Peskov-i tan iba olenji sangoktsür lir.

“Syria Tir, Bashar al-Assad-i aniba Syria sorkari par mitkar tashi amshiba ajanga dang par mangtettep ken o bentettettsü ta tangatetba yua lir. Par mitkar tashi amshia, Syria lushi ajunga sorkar anemer aser kiralongrar ket nungi tanaben agishitsü tenangzükba ka Assad-i metetdaktsüogo,” ta US’er UN Ambassador, Samantha Power-i kasa senden nung metetdakja lir.

Syria kübok Aleppo yimti nung timtem toushi jenti ajurua alir nisung 275,000 amakba maparen anentsütsü atema Russia-i Syria sorkar ajungshidaktsütsü nükjidong nung US, France aser Britain linüktemi aroki lungjemer tan rongdak UNSC sendenji jatepa liasü.

“Russia-i Syria nung tensa tajungba kümdaktsütsüsa Syria nung mangatettep adoka aliba teloktem rong nung yimjung senden maneni amentsü ayongtsüla,” ta Britain’er UN Ambassador, Matthew Rycroft-i iba senden nung lemsatepba osang jangjaogo.