US o China na tsüngda tesendaktep tajung alitsüla: Xi

Seattle, September 23 (Agencies): US aser China na tsüngda tesendaktep tajung alitsü nungdaka akümba olen ka tang US semdanga alisang, China Tir, Xi Jinping-i yashi Mongolbar nü metetdaktsüogo.
Hopta ka agia US semdangtsü tenzüksang, Xi-i Washington semdanga US Tir, Barack Obama aser pai aniba lenirtem den ajurutepba jakdang, Seattle yimti nung shishilembar lenirtem den ajurutepa senden ka amendang Xi-i iba olenji metetdaktsü.
“China o US na tsüngda tesendaktep tajung yua asen linük ana tsüngda amalitep lira, asen linük ana ya alima ajunga indang tamendakdak lung akümtsü. Ajisüaka, asen linük ana tsüngda tesendaktep mejungi küma tongpang raratsüsa kümra, iba jagi alima ajunga nem timtem tulu bener arutsütsü,” ta China Tir ka ama tan mezüngsüa US semdangsang, Xi-i ashi.
Ano, “China sorkari shishilembatsü tajangzük angutsü nükjidong nung ozüng alema inyaktsü renema maliba den külemi, yamaji inyakertema nokdangtsü renema lir,” ta shia, par linük ana tsüngda adokba cyber hacking den sentakba onüka Obama den benoka jembitsü sentong aliba osang ka Xi-i lemsatepa liasü.
Cybercrime ta ajaba ozüng alema computer aser internet ajanga shishilembatsü aser iba amala miim osangtsüsang agiba maparen nokdangtsü nükjidong nung par linük anati külemi amalitepa inyaktsü renema aliba olen ka pai metetdaktsü.
Ano, par China nung yangluba osettsüset bendanglen yokshitsü maparen tajungba kümdaktsütsü asoshi par yuan sen jenjang tajemba mekümdaktsütsü renemba osang ka pai yashi sangoktsü.
Beijing-i mapang jilia osang kecha memetetdaktsüi tawa par yuan sen jenjang tajemba kümdaktsüba ajanga alima tesem balala talisa, US ketdangsertemi tang tebilemtsü khuret benoka lir.
Aji oda, Xi o Obama nati tan Hokolbar nü White House nung ajurutepa senden amendang cybercrime aser rongsenren den sentakba onük tongtipangsüa benoktsü renema lir.
Ano, China-i South China Sea nung par miktar jenjang tajungba kümdaktsütsü maparen inyakba den sentakba onüka lenir anati benoka jembitsü sentong renemba osang ka White House ketdangser kati metetdaktsüogo.