US o China nati Paris Climate tezüngzüktep mapa küma inyaktsü nangzükshir

US Tir, Barack Obama (Abelen) aser China Tir, Xi Jinping nati China kübok Hangzhou nung tentetba West Lake State Guest House nung ajurutepdang agiba noksa ka yangi angur. (Hangzhou, September 03)

Hangzhou, September 03 (Agencies): US aser China nati Paris Climate tezüngzüktep mapa küma inyaktsü asoshi tanü, Honibar nü nangzükshiogo.
Alima tali tatsükba küma tsüngsang mupong balaka küma melenshibaren azüoktsü nükjidong nung yaküm France yimtiba, Paris nung amenba Climate senden nung alima tzü mupong menentsüba maparen ajemtsütsü asoshi nangzüker linük rong nung par linük ana ya densema lir.
Yaküm agiba tenangzükbaren taküm küm tatem tashi nung mapa küma inyaktsü nükjidong nung alima ajunga nung tzü mupong tesashitiba menentsür linük anati par tenangzükba mapa küma inyaktsü asoshi tan nangzükshir lir.
China kübok Hangzhou nung amentsü ayongba 2016 G20 summit senden nung shilem agitsü atema Hangzhou tonga oa, China Tir, Xi Jinping den ajurutepa jurila senden ka amenba sülen US Tir, Barack Obama aser Xi nati par tenangzükba mapa küma inyaktsü nangzükshiba osangji metetdaktsü.
“Alima tali tatsükba akümba tongpang ya komaka tashi itaka, alima linük ka kija koktetba tongpang masü. Anungji, alima linük ajungai alima tali tatsükba akümba aser iba ajanga alima tsüngsang mupong balaka küma melenshidaktsüba azüoktsü asoshi nungdakba maparen inyaktsüla,” ta Obama-i sangoktsü.
“Aseni tanü telemtetba aser mera tajung agiba ajanga tarutsü mapang asen nüburtem aser meimchir ajunga nem tajangzük tulu bener arutsütsü,” ta Xi-ia metetdaktsü.
Paris nung yaküm December ita amenba Climate senden nung US aser China na densema, alima linük 179 tashi alima tzü mupong menentsüba maparen tajemba kümdaktsütsü nangzük saka tanü tashi nung alima linük 23 shi dang par tenangzükba mapa küma inyakba osang bushiteta lir.
Alima lenirtemi alima tali tatsükba akümbaren noklang nung shilem 2 agibosa tajemba kümdaktsütsü alizüng yua lir saka tajemba agi alima linük 55 shi miim aketba greenhouse tango adoktsübaren ajemtsüba ajanga dang iba alizüngji asangsang nung ajangzüktettsüsa tan tensa ajurua lir.
US aser China nati tan tenangzükba agishiba ya tongti mera ka agi lir kechiyong alima ajungai adoktsüba miim tango noklang nung China-i shilem 25 aser US-i shilem 15 adoktsüba osang bushiteta lir.