US o France nati IS telok den tesashiba raratsü: Francois Hollande

US Tir, Barack Obama (Achijilen)-i France Tir, Francois Hollande den Washington kübok White House kilung nung yashi Mongolbar nü ajurutepba noksa nung angur. (Washington, November 25)

 Washington, November 25 (Agencies): US aser France linük nati Iraq aser Syria na nung tesep tenteta Iraq o Syria na den külemi, alima tesem balala nung kiralongratsü lendong tesashi atalokdaktsüba kiralongrar telok, Islamic State (IS) den taoba mapang nungi tesashiba raratsü lemtetba osang ka France Tir, Francois Hollande-i yashi Mongolbar nü metetdaktsüogo.

Tawa France yimtiba, Paris nung IS teloki lendong kanga sashia atalokdaktsüba sülen Hollande-i yashi Washington yimti semdanga US Tir, Barack Obama den ajurutep aser IS anema raratsü onük benoka senden amen.

Aji oda, lenir anati yashi senden amenba sülen Washington kübok White House nung osangbener den aroki ajurutepdang Hollande-i iba olenji metetdaktsü.

Ano, Syria aser Iraq na nung tentetba telungpur aser kiralongrartem Europe-i ayonga maitdaktsütsü nükjidong nung Turkey arrtsü ajangertem tali kümdanga mitsü asoshi Turkey sorkar ajungshi telemtetba ka tenati agi ta Hollande-isa shisem.

“France linük ya ozü US linük indang tembar tajung ka lir aser ozü US sorkari tensa ajunga nung France linük nungita nungdakba teyari agütsütsü mulunga lir,” ta Obama-ia yashi sangoktsü.

US-i linük maneni Europe linüktem den külemi amalitepa IS telok anema raratsü renemba osang ka Obama-isa metetdakja liasü.

Alima tashi abenba linüktemi külemi lungjemer IS telok anema raratsü ajungmesotsü nükjidong nung Hollande-i tan US semdanger lir.

Kasa nükjidong bener Hollande-i asüng, Brehostibar nüa Russia semdanga par lenirtem den ajurutsü sentong renema lir.