US o India nati UN mitkartem nem mitkar terenemshiba agütsütsü

Washington, September 23 (Agencies): United States (US) o India nati United Nations (UN) mitkartem nem Africa kübok tentetba linük 6 nung mitkar terenemshibaren agütsütsü tezüngzüktep ka yashi Mongolbar nü agiogo.
US Secretary of State, John Kerry aser India External Affairs Minister, Shushma Swaraj nati iba tezüngzüktepji yashi Washington yimti nung agia liasü.
“UN mitkartemi alima tesem balala nung tensa azüoktsü maparen inyakba jakdang parnok nem mitkar terenemshibaren Africa kübok densemba linük 6 nung tamasa agütsütsü tezüngzüktep ka ozü linük anati agiogo,” ta Kerry-i osangbener den ajurutepdang metetdaktsü.
Ajisüaka, iba mitkar terenemshibaren agütsütsü sentongtemji koba linüktem nungsa agitsü renem iba osangbo pai memetetdaktsü.
Ano, par linük anati energy kümzüka ayutsü aser alima tsüngsang mupong balaka küma melenshiba den sentakba onüka lenir anati benoka jembiba osang jangjaogo.
Alima ajunga nung miim aketba carbon tango timba adoktsüba linük tarensen nung India ya tasembuba jenjang nung aliba yong taküm 2015 küm December ita Paris nung amentsü ayongba UN climate senden nung India-i tongti shilem agitsüsa akümba osanga jangjaogo.