US o NATO nati Russia mitkar den sentakba tebilemtsü khuret akar

Washington, September 10 (Agencies): Russia mitkartem Syria-i tsüngdong oa idakji tongti shilem agiba den sentakba tebilemtsü khuret ka United States (US) aser North Atlantic Treaty Organization (NATO) nati tanü Brehostibar nü metetdaktsüogo.

“Russia mitkartemi par tayimtsü amshia tongpang nung amshitsü osettsüset Syria tonga bener aoba osang jangjaogo. Ajisüaka, par mitkartemi yamaji inyakba ajanga Syria indang tensa tang dang nungi tamajungba kümdaktsütsü ana nung lir,” ta US State Department otongdar, John Kirby-i tanü metetdaktsü.

“Russia mitkartemi Syria nung par mitkar sentong balala inyaktsü tenzükba den sentakba onükji ozü Secretary of State, John Kerry-ia Russia Foreign Minister, Sergei Lavrov den telephone ajanga benoka jembiogo,” ta Kirby-i ashi.

Russia-i par mitkartem Syria-i yoka mitkar sentong balala inyakdaktsüba ajanga tensa kanga mejungi aliba Syria nung lendongtsüdong tesashiba atalokdaktsütsü ta Kerry-i Lavrov den lemsatepba osanga jangjaogo.

“Russia densema, alima linük kati danga Syria nung tensa junga lidaktsütsü nükjidong nung Syria Tir, Bashar al-Assad-i aniba mitkartem nem tayimtsü amshia teyari magütsütsü asoshi taoba mapanga metetdakja lir,” ta White House otongdar, Eric Schultz-ia metetedaktsü.

Russia-i par mitkar züngsem aser mitkar tayimtsütem Syria-i yokba osang angazükba sülen tebilemtsü khuret benokba olen ka NATO Secretary General, Jens Stoltenberg-ia Prague yimti nungi metetdaktsüogo.

“Russia-i par mitkar tayimtsü aser mitkar züngsemtem Syria-i tsüngdong yokba ajanga Syria’er mangatettep ken o bentettsü maparen nem tetsükdakba tulu bener arutsütsü,” ta Stoltenberg-i sangoktsü.

Ano külen, Russia-i Syria sorkar dang ayokba tongpang nung amshitsü mitkar osettsüset amshitsüren Syria mitkartem dang sayutsü asoshi Russia’er mitkar mongintem Syria-i yokba osang ka Russia’er Foreign Ministry otongdar, Maria Zakharova-ia tanü metetdaktsüogo.

“Ozü Russia-i Syria sorkar den mitkar tezüngzüktep agia tongpang nung amshitsü osettsüset par linük dang ayokba maparen ya tan asensa inyaker masü aser ozü sorkari Syria dang tongpang osettsüset ayokba maparen ya mimbangtsü asoshi ken danga inyaka mali,” ta lai ashi.

Syria aser kidangsüa aliba Iraq linük na nung lendong kanga sashia atalokdaktsüba kiralongrar telok anema raratsü maparen nung amshitsü asoshi lar Russia-i tongpang nung amshitsü osettsüsetji Syria tonga bener otsüba osanga lai metetdakja liasü.