US o Russia anünglak senzür 3 ISS tonga tuogo

Cape Canaveral, March 19 (Agencies): US nung tentetba National Aeronautics & Space Administration (NASA) anünglak senzür 1 aser Russia nunger anünglak senzür 2 densema, ajak agi anünglak senzür 3 aniba Russia nunger Soyuz anünglak tayimtsüi alima toktsür ghonda 6 shi jajaba sülen anünglak tentetba International Space Station (ISS) tanü, Hokolbar nü tonga tuogo.
US nunger Jeff Williams aser Russia nunger Oleg Skripochka o Alexey Ovchinin nati Kazakhstan nung tentetba Baikonur Cosmodrome tanü nikongtsütsü 5:26 ako meta toktsüba sülen ISS aonung 11:09 ako meta tonga atuba osang jangjaogo.
ISS nung küm 1 shi  tetendangbaren balala agia monger tan March ita tetenzüklen alimai tanaben meyipa alur anünglak senzür melenzüka tan anünglak senzür 3-i ISS tonga atur lir.
Taoba mapang anünglak tonga 3 ben tashi atusang, Williams; anünglak tonga ken atusang, Skripochka aser tan mezüngsüa anünglaki atusang, Ovchinin nungeri alima nungi anünglakleni kilometer 400 shi pilar tentetba ISS nung taruba ita 6 shi monga tetendangbaren balala agitsü sentong lir.
ISS nung anogo 340 shi monger tan March ita 1 nü alimai meyipa alur, NASA anünglak senzür, Scott Kelly aser Russia nunger Mikhail Kornienko na ama ISS nung küm piyong mongdaktsütsü atembabo NASA o Russia nati anünglak senzürtem meshimteti aliba osanga jangaogo.
Ano külen, arishi küm 58 tain Williams-i tan anünglak amongba züngsema, anünglak ajak agi anogo 534 tashi amonger akümtsü lir aser timtem kecha majurui iba alizüngji asangsang nung ajangzükra, pai anünglak anogo 520 tashi amongsang, Kelly-i tawa yangluba anünglak mapang talangtiba amonger NASA anünglak senzür akümba otsü ajangtettsü.
Ajisüaka, 5 benbuba atema anünglak tonga tur yaküm Septembar ita alimai meyipa alusang, Russia nunger Gennady Padalka-i ajak agi anogo 879 tashi anünglak monga anünglak senzür rong nung mapang talangtiba anünglak amonger otsü yanglua lir.