US o Russia nati Syria Chemical Weapons tezüngzüktep ka agir

Kuala Lumpur, August 06 (Agencies): Syria nung miim aketba chemical tongpang oset amshia nisung tepsetertem aputsü asoshi büshisüngdangtsü telok ka tentettsü tezüngzüktep agiba sülen US aser Russia nati iba onükji United Nations (UN) nung tanü Brehostibar nü benokogo.

US o Russia nati benokba ama, UN-i bushisüngdangtsü telok tentettsü asoshi UN lenisang, Ban Ki-moon dang asüngdangtsü telemtetba agitsü atema United Nations Security Council (UNSC)-i asüng, Hokolbar nü senden ka amentsü ayonga lir.

Aji oda, züngsem 15 densemba UNSC-i benoka onükji Ban-i agizükra, Syria nung miim aketba chemical tongpang oset amshirtem pua parnok nem tapet temerenshi agütsütsü lenmang lapoker asütsü.

“Ita 1 tejaklen nungi tenzüka jembitepa aruba sülen US Secretary of State, John Kerry aser Russia Defence Minister, Sergei Lavrov nati tanü Malaysia kübok Kuala Lumpur nung ajurutepa UN nung bushisüngdangtsü telok tentettsü onük benoktsü tezüngzüktepji agi,” ta pa tenüng memetetdaktsütsü nangzüktepba sülen US sorkar ketdangser kati tanü metetdaktsü.

Taoba mapanga UNSC nung züngsemba linüktemi Syria nung chemical tongpang oset amshibaren nokdangtsü onük benoka liasü saka Syria Tir, Bashar al-Assad pusemba Russia linüki kasaji nokdanga liasü.