US o Russia nati Syria senden menshitsü ajungshir: China

Beijing, November 04 (Agencies): US o Russia nati Syria nung yimji yimjung lidaktsütsü den sentakba senden maneni amentsü tajungshiba olen ka China’er Syria Special envoy, Xie Xiaoyuan-i tanü, Hokolbar nü metetdaktsüogo.
US aser Russia nati senden ishiben amenba sülen Syria nung rarabaren anenja, par linük yimtenren tebentetbaren bener arutsütsü den sentakba senden mapang telatet meli anentsü osang sangoktsür hopta ka shi nung Xie-i tan tajungshiba olenji sangoktsür lir.
“US o Russia nati Syria senden maneni amentsü ajungshir. China-ia tarutsü anogotem nung Syria nung yimtenren tebentetbaren bener arutsütsü mapatong nung tongti shilem agitsü alizüng lir saka ozü linüki tangtangbo timtem toushi ajurua alir Syria nüburtem nem nungdakba teyari osettüset agüja, parnok yaritsü maparen tongtipangsüa inyaktsü lemteta lir,” ta pai ashi.
“Mitkar tashi amshia, tongpang raraba ajanga Syria ken o kodanga mebentettettsü ta ozü China-i taoba mapanga metetdaktsüogo. Anungji, US o Russia nati Syria nung yimtenren tebentetbaren bener arutsütsü atema senden maneni amentsü ajungshir,” ta Xie-i nenshia ashi.