US o Russia nati Syria tongpang anentsütsü nangzükteper

Geneva, September 10 (Agencies): Küm 5 tejaklen nungi tenzüka, Syria nung mangatettep adoka tongpang kanga sashia rarabaren anentsütsü aser par linük ana tsüngda amalitep lia, Syria nung tentetba kiralongrar teloktem den maneni raratsü tezüngzüktep ka US aser Russia nati tanep, Honibarnep agiogo.
Tan tezüngzüktep kübok Syria ajunga nung tongpang raraba teloktemi Muslim nunger Eid al-Adha benjungmong tenzükba anogo, tan September ita 12 nü nungi tenzüka par tongpang rarabaren anena yimjung nung alitsü ajungmesotsü renemogo.
“Syria aser Syria temeket nung aliba nüburtemi temoatsü ngua, par Eid benjungmong mongdaktsütsü nükjidong nung tang Syria nung tongpang raraba telok ajungai par rarabaren anena yimjung nung alitsü mulungtetdaktsüner. Ozü US aser Russia nati Syria tongpang anentsütsü aser par linük tentetba kiralongrar anema raratsüren nung maneni amaliteptsü nangzüktepogo,” ta Russia Foreign Minister, Sergei Lavrov den senden ka amenba sülen pa den aroki osangbener den ajurutepdang US Secretary of State, John Kerry-i tanü sangoktsü.
Par linük anati tan tezüngzüktep agiba sülen Syria mitkartemi par tayimtsü amshia, sorkar anemertem alidak aser telatetba tesem balala nung bomb-tem tsükdakja mamaktsü latetogo.
“Syria Tir, Bashar al-Assad-i aniba mitkar tayimtsütemi bomb-tem tsükdakja amakba ajanga tai maketba nübur jenti tepsetba osang bushiteta lir. Syria mitkartemi par tayimtsü amshia amakba maparen inyakba tesemtem nung amaktsü maparen meinyakdaktsüi nokdangba ajanga nübur taküm jenti kümzüktsü imlar,” ta Kerry-i ashi.
“Assad-i aniba Syria sorkaria tan nangzüktepba ama, mapa küma inyaktsü mulunga lir,” ta Lavrov-ia metetdaktsü.
Tan nangzüktepba ama, mapa küma inyaktsü nükjidong nung US aser Russia nati Islamic State (IS) aser Nusra Front kiralongrar telok anema raratsüren nung amalitepa inyaktsü asoshi ‘Joint Implementation Center’ ka tentettsü renemogo.
United Nations (UN)-ia tan US aser Russia nati agiba tezüngzüktepji pusema nungitsü renemba olen ka UN’er Syria Special Envoy, Staffan de Mistura-ia metetdaktsüogo.
“UN-i US aser Russia nati agiba Syria tongpang anentsütsü tezüngzüktep takok ngudaktsütsüa par linük ana pusema nungitsü renema lir. Ano, UN lenisang, Ban Ki-moon den tongtepratepba sülen taruba Syria yimjung senden amentsü anogoa latettsü sentong lir,” ta pai shisem.