US o S Korea nati teloktep mitkar terenemshiba agir

Seoul, August 28 (Agencies): United States aser South Korea nati teloktep mitkar terenemshiba sentong ka arrtsülen tentetba Pocheon jila nung tanü Hokolbar nü agiba osang jangjaogo.

Tongpang nung amshitsü injang aser bomb-tem kadoka tan agiba terenemshiba sentongji par linük anati tanü tashi nung teloktep mitkar terenemshiba sentong tulutiba agir lir.

North o South Korea na tsüngda tongpanga raratsüsüa tensa tamajung ajurur anogo ishika lir külen US o S Korea nati par teloktep mitkar sentong ya tan agir lir.

Taoba mapang nunga, Washington o Seoul nati tan amala teloktep mitkar terenemshiba sentong agiba ajanga N Korea lenisang, Kim Jong Un kanga jashidaktsüba osang bushiteta lir.

Ano külen, jembitepba senden amenba ajanga masü saka par linüki tongpang nung amshitsü nuclear oset rinzünga aliba ajanga S Korea-i par linük den meraratsü nangzüktepba osang ka Kim-ia tanü Hokolbar nü metetdaktsüogo.

Pyongyang o Seoul na ketdangsertemi aonunga memejangi arrtsülen tentetba Panmunjom yimtsüng nung jembitepba senden amenba sülen par linük anati meraratsü tezüngzüktep tawa agiba osang bushiteta lir.

Kim-i par nuclear tashi ita aliba olen metetdaktsüba den külemi, Central Military Commission (CMC) nung züngsemba mitkar lenir aika tanü lenisütsü menden nungi anentsür külen lenir tasen shimokba osanga jangjaogo.

Ajisüaka, kechi timtem ajanga Kim-i CMC lenirtemji lenisütsü menden nungi anendaktsü iba osang tejangjabao tang tashi metetdakja mali.

Par linük ana tsüngda meraratsü nangzüktepba den külemi, par linük anati tarutsü mapang nung maneni Seoul mesüra Pongyang nung ajurutepa jembitepba senden amentsü sentong renemba oang ka S Korea presidential security advisor, Kim Kwan-jin-ia metetdaktsüogo.

Aji oda, sentong renemba ama, par linük ana nungi tongti ketdangsertemi taruba September ita senden amentsü renema lir.

“North o South Korea nati jembitepba senden amenba ajanga par linük ana tsüngda tesendaktep tajungba akümtsü imlar. Ano, par linük ana tsüngda tesendaktep junga aliba ajanga Korean peninsula nunga tensa tajungba akümtsü,” ta US State Department otongdar, John Kirby-ia metetdaktsü.