US Open 2017: Sania aser Peng na semi-final tongogo

New York, September 08 (Agencies): India tsür Sania Mirza ya 2017 küm Grand Slam nung semi-final-i tang mezüngbuba iogo. Lai China tsür Shuai Peng den külemi US Open 2017 tetsür tennis tarep asaya quarter-final nung Timea Babos aser Andrea Hlavackova na madak takok angu.
Sania aser Peng na ya jenjang pezü buba nung lir aser tenati jenjang pongu buba nung alir Hungary aser Czech Republic tsür ana den ghonda ka ser minute 56 asayaba nung 7-6(5), 6-4 agi takok angu.
Iba season nung Sania asoshi tongtibang asayamung nung tajungtiba agi shilem agiba ji tang ya mezüng lir. Taküm Australian Open aser Wimbledon nung la ya round asem buba nung tsük aser French Open nung bo mezüng buba round nung tsüka liasü.
Sania aser Peng na ya semi-final nung second seeded, Martina Hingis aser Yung-Jan Chan na den asayatsü. Hingis aser Chan nati India tsür Sania aser Belgium tsür Kirsten Fliokens na Wimbledon tarep asaya nung tsükdaktsü.
Tang season Grand Slam nung Sania ya nisung balala den külemi tarep asaya nung shilem agia lir. Lai mezüng Barbora Strycova den külemi asaya saka Australian Open indang tasembuba round nung Eri Hozumi aser Miyu Kato nati tsükdaktsü.
Roland Garros nung lai Yaroslava Shvedova den külemi asaya saka mezüngbuba round nung Daria Gavrilova aser Anastasia Pavlyuchenkova nati tsükdaktsü.
Taküm season nung lai Brisbane WTA dang koka lir aser iba asayamung nung lai America tsür, Bethanie Mattek-Sans den külemi asaya.
2016 nungbo lai takok marok ti tashi ngutet aser item takok rongnung pongu bo Swiss tsür Martina Hingis den külemi asayadang angu.
2016 küm tembangba mapang la tarep asaya nung World No. 1 nung tembang saka Hingis den pilaba sülen bo No. 9-i alua lir.