US Open 2017: Venus Williams semi-final tongogo

New York, September 6 (Agencies): Grand Slam 7ben bena alila Venus Williams ya US Open otsü nung tantsütilai semi-final tongteter kümogo. Arishi küm 37 tain, Venus-i tetsür kija US Open quarter-final nung 6-3, 3-6, 7-6 (7/2) agi Petra Kvitova ya Mongulbarnü tsükdaktsü.

US tsür Williams-i iba asayamung anaben koka lir aser la ya Honibarnü final asayatsü asoshi World No. 83, Sloane Stephens den Brehostibarnü semi-final asayatsü.

Kasa asayamung tebur kija asaya nung South Africa nunger Kevin Anderson-i Spain nunger Pablo Carreno Busta tsükdakja pa asoshi Grand Slam semi-final mezüngbuba tongogo.

Stephens tetsüng abelen yiruba ajanga ita 11 asaya kata nunga shilem magiteti lir Wimbledon nungi asaya tenzük, aser lai Latvian tsür Anastasija Sevastova madak 6-3, 3-6, 7-6 (7/4) agi koka quarter-final tongtet.

Stephens-i tang tesüsa matches 15 asayaba nung 13 ben koka lir aser lai 2013 Australian Open nunga iba ama asaya liasü.

Williams aser Czech tsür Stephens tsüngta trokben asayaba nung US tsürlai anaben dang akoker aser la ya January 2011 sülen alima nung tetsür tennis kija asayar temaba jenjang pongu rongnung züngsemtsü.

Williams-i US Open takok marok ya 2000 aser 2001 nung bena lir. La ya taküm Wimbledon aser Australian Open nung runner-up liasü.

Taoba küm December ita mejangjaba nisung ka ki telungi aita kotari agi teben achichilen yirutsüba sülen Kvitova ya ita pongu asayamung kata nunga shilem magiteti aru.

“Temaba jenjang nung asayar tajung den tokteptetba asoshi ni kanga pelar aser iba ajanga ni maneni junga asayatettsü asoshi tasü tait molungsentsü agütsür,” ta Kvitova-i ashi.

Bodhbarnü asayaba nung America tsür Madison Keys aser CoCo Vanderweghe nati kokra 1981 nungi tang tashi nung US Open semi-final nung America tsür kisüng asayatsü.

Kasa asayamung teburtem kija asaya nung Bodhbarnü quarter-final asayatsü asoshi tennis asayar mongin, Roger Federer aser Rafael Nadal renema lir aser tata asaya nung tenati takok ngura Hokulbarnü teburtem US Open semi-final nung tena mezüngbuba asayatsü.

Hokulbarnü semi-final asayatsü asoshi South Africa nunger World No. 28, Anderson-i America nunger World No. 17, Sam Querry madak 7-6 (7/5), 6-7 (9/11), 6-3, 7-6 (9/7) agi akok.

Anderson ya Spain nunger Carreno Busta den semi-final asayatsü.

Carreno Busta-i quarter-final nung Argentina nunger Diego Schartzman ya 6-4, 6-4, 6-2 agi tsükdaktsü.