US Open: Del Potro-i Roger Federer tsükdaktsüogo

New York, September 7 (Agencies):  Juan Martin Del Potro-i Bodhbar nü ashiba agi, pai US open quarter-final nung Roger Federer akoktsü asoshi langa liasü. Iba takok ajanga pa Hokolbarnü Rafael Nadal den semi-final asayatsü asoshi jangjaogo.

Argentina nunger asayar yagi Grand Slam 19 ben koker alisang Federer, 7-5, 3-6, 7-6 (10/8), 6-4 agi Arthur Ashe Stadium nung kokogo.

“Iba yaa kü home court amai belimer,” ta Del Potro-i sentepa aliba nüburtem dang ashi. “Ni idaki asayadang nenoki ni teti peladaktsür aser nenoki ni nungita pusemba ni kanga meimer.”

Federer makok tsüngda Del Potro-i ashiba agi, 2009 küm pai  Nadal akokba tanaben lepshitsü imlar.

“Rafa tanaben lepshia ni akoktsü imlar. Rafa den asayadangbo crowd kü atema tasak asütsü saka parnok ni maneni pusemtsü imlar,” ta Del Potro-i ashi.

“Pa alima nung temaba jenjang nung lir saka iba amala pusemertem tsüngdang kechi ang ataloktsüar memetet,” ta paisa ashi.

Asaya tembangba sülen Federer-i Potro tenüngsanga ashiba agi, “Juan Martin-i molungsongzü ama raraogo.”

“Ni tang asayaba yimya nungbo asayamung tem mekoktettsü. Ni iba asayamung nungi tugua tangar kari akoktsü asoshi maongka agütsüba tajungba lir,” ta Federer-i ashi.