US Open: Del Potro, Nadal aser Williams semifinal tongogo

New York, Rongjui/September 5 (Agencies): Sangtennü US Open tebur kija asaya nung Juan Martin Del Potro-i 6-7(5) 6-3 7-6(4) 6-2 agi John Isner koka semi-finals tongtetogo. Tena tsüngda tatsük nung ghonda asemser minute 31 asayaa liasü. Anogo kanga tatsüka asüba ajanga ketdangsertemi outside court tem nung junior asaya ghonda ana tashi masayadaktsüi anendaktsü, saka Arthur Ashe Stadium nung 100 degrees Fahrenheit (37.7°C) nung Isner ser (1.98m) Del Potro na kanga kangshia asayaogo.
“Ni tozük nung pound 238 lir anungji ni iba amala tatsük nung asayadang kanga timatemer,” ta Isner-i ashi shibai tola 11 tashi melena liasü.
Kasa mapang nung Del Potro-i, “ni kanga junga asayaogo ta bilemer. Talisa ni service game ajak junga asayaogo. Ni John tera belemba angu aser iba ajanga tali merangtsü asoshi tashi angu.
“Ni tanga mapang dang nungi tajungtiba asayar asü masür mejangja saka ni jangratema asayadar. Ni grand slam semi final ka tongtetogo aser iba ya kü atema kanga tongtibang lir,” ta Argentina nunger asayari ashi.
Tebur kija asaya tanga ka nung Rasemnü Rafael Nadal-i 0-6, 6-4, 7-5, 6-7 (4), 7-6 (5) agi Dominic Thiem madak takok ngua Grand Slam asayamung asem atonga semifinal tongtetogo.
Tena tsüngda asaya mezüngbuba 6-0 agi Nadal-i makok saka set pongu ghonda 4 ser minute 49 kanga meranga asayaba sülen Nadal-i asaya kokogo.
“Dominic ya iba tour nung medemer tajung ka aser asayar tajung ka lir. Kü atema iba asaya tetenzük kanga tasak liasü saka ni asaya nung rangloker asayatsü merang,” ta Nadal-i ashi.
Tena tsüngda tanü asaya ya Aami/June nung French Open final asayashiba ama liasü koba Nadal-i kokogo. Maneni US open nung 2013 küm Novak Djokovic final nung akokba sülen top-20 nung asayar ka den taküm mezüng asayaogo.
Rogonü Nadal 2009 champion aser No. 3 seed Juan Martin del Potro den final nung jenjang ka atema asayatsü.
Maneni US open tetsür kija asaya nung Sangtennü Serena Williams-i Czech tsür Karolina Pliskova koka semifinal tongtetogo.
Lai 6-4 6-3 agi Pliskova madak takok angu.
Arishi küm 36 tain Williams taküm agi iba asayamung tenetbenbuba akoktsü asoshi aser iba den külem career Grand Slam 24buba akoktsü atema meranga asayadar. La Pliskova den asaya kanga mejungi tenzük aser mapang ka nungbo 3-1 agi tesülen liasü. Williams-i mezüngbuba set nung unforced errors 22 mena saka iba sülen asentenshir asayaa lai set pezü atonga koka set akok.
“Nüburtemi ni pusema liasü saka ni junga masayatetba atema ni mepelai liasü, anungji ni tali temerangba asayatsüla ta bilem,” ta Williams-i ashi.
Semi-final nung la Latvia tsür Anastasija Sevastova den asayatsü.