US Open: Federer 2 buba round-i iogo

New York, September 02 (Agencies): Taoba mapang US Open asayamong takok marok 5 ben tashi agizüksang, Roger Federer-i 1 buba round akokba sülen tang tasayadak US Open asayamong tebur singles shilem indang 2 buba round asayatsü jenjang yashi Mongolbar nü ajangzükogo.
Tan asayamong nung 2 buba jenjang abensang, Federer-i minute 77 nung ace 12 aser winner 29 yangluba densema points 6-1, 6-2, 6-2 ngua World No. 34, Argentina nunger Leonardo Mayer 1 buba round nung tsükdaktsü.
Switzerland nunger arishi küm 34 tain Federer-i Belgium nunger Steve Darcis den 2 buba round nung ajuruteptsü.
2012 US Open takok marok agizüksang, Andy Murray-ia yashi points 7-5, 6-3, 4-6, 6-1 ngua Australia nunger Nick Kyrgios tsükdaktsüba sülen 2 buba round-i aiba osang jangjaogo.
Tan asayamong nung 3 buba jenjang abensang, Britain nunger Murray-i France nunger Adrian Mannarino den 2 buba round asayatsü lemzükogo.
Tetsür singles shilem nunga, Ukraine tsür Lesia Tsurenko-i yashi points 6-4, 6-1 ngua Czech Republic tsür, Lucie Safarova 1 buba round nung tsükdaktsü.
Tetsür World No. 2, Simona Halep-ia points 6-2, 3-0 ngua temaba jenjang nung alidang, la den toktepa asayala, New Zealand tsür Marina Erakovic temokok yirua masayatettsüsa akümbba yong Halep-i iba asayaji koka 2 buba round asayatsü jenjang angu.
Taoba mapang Wimbledon takok marok 2 ben tashi agizükla, Czech Republic tsür Petra Kvitova-ia minute 59 nung points 6-1, 6-1 ngua Germany tsür Laura Siegemund 1 buba round nung tsükdakja 2 buba round asayatsü jenjang ngua lir.