US Open: Paes o Hingis nati mixed doubles takok marok agizükogo

Leander Paes aser Martina Hingis nati US Open 2015 mixed doubles takok marok amer agiba noksa nung angur. (New York, September 12)

New York, September 12 (Agencies): India nunger Leander Paes aser Switzerland tsür Martina Hingis nati final asaya koka US Open 2015 mixed doubles shilem indang takok marok yashi Hokolbar nü agizükogo.
Australian Open aser Wimbledon champions, Paes o Hingis nati points 6-4 3-6 10-7 ngua American asayar Sam Querrey aser Bethanie Mattek-Sands na final nung tsükdaktsüba sülen taküm 2015 küm nung tan agi mixed doubles takok marok 3 buba agizüktsü maongka angu.
Tan agizükba ya arishi küm 42 tain Paes-i mixed doubles takok marok 9 buba aser Grand Slam takok marok 17 buba agizüker lir.
Tetsür singles takok marok 5, tetsür doubles takok marok 10 aser mixed doubles takok marok 4 densema Hingis-ia tan agi Grand Slam takok marok 19 buba agizüker lir.
Ano külen, taoba mapang US Open singles takok marok 5 tashi agizüksang, Switzerland nunger Roger Federer-i külem sensopur, Stan Wawrinka madak points 6-4, 6-3, 6-1 agi semfinal asaya koka Serbia nunger Novak Djokovic den final asayatsü jenjang yashi nguogo.
Tebur World No. 1, Djokovic-ia yashi points 6-0, 6-1, 6-2 ngua defending champion, Croatia nunger Marin Cilic semifinal nung tsükdaktsü.
Tetsür singles shilem nunga Italy tsür Robera Vinci-i tetsür World No.1 aser defending champion, America tsür Serena Williams semifinal nung tsükdaktsüba ajanga alima ajunga aoksadaktsüogo.
Vinci-i points 2-6, 6-4, 6-4 agi Serena madak takok anguba sülen külem sensotsür, Flavia Pennetta den final asayatsü jenjang ajangzük.
Pennetta-ia points 6-1, 6-3 ngua Romania tsür Simona Halep madak takok anguba sülen final nung shilem agitsü jenjang angu.