US Open: Serena o Murray na 3 buba round-i iogo

New York, September 02 (Agencies): Wimbledon champions, Serena Williams aser Andy Murray nati pei asaya koka tang tasayadak US Open tennis asayamong tetsür aser tebur singles 3 buba round asayatsü jenjang yashi, Brehostibar nü nguogo.
America tsür, Serena-i ace 13 tashi yanglua, points 6-3, 6-3 ngua külem sensotsür, Vania King 2 buba round asaya nung tsükdaktsü.
Tetsür World No. 1, Serena-i tan takok anguba sülen Grand Slam asayamong asaya 306 buba akoker küma, Martina Navratilova-i taoba mapang yangluba tetsür asayar kati Grand Slam asaya timtiba akokba otsü menepogo.
Serena-i 7 buba US Open takok marok aser 23 buba Grand Slam takok marok agizüktsü alizüng yur tan asayamong nung toktepa asayatsü tenzüka lir.
Tawa tembangba Rio Olympics nung tennis gold medal agizüksang, Britain nunger Murray-ia points 6-4, 6-1, 6-4 agi tang 45 buba jenjang nung alisang, Spain nunger Marcel Granollers 2 buba round asaya nung tsükdaktsü.
Serena teyi, Venus Williams-ia points 6-2, 6-3 agi Germany tsür, Julia Goerges madak takok ngua US Open asaya 70 buba akokba otsü yanglua liasü.
Tan asayamong nung 5 buba jenjang abenla, Romania tsür, Simona Halep-ia points 6-3, 6-4 ngua, Czech Republic tsür, Lucie Safarova tsükdaktsüba osang jangjaogo.
Japan nunger Kei Nishikori-ia points 6-4, 4-6, 6-4, 6-3 agi Russia nunger Karen Khachanov 2 buba round nung tsükdaktsüba osang angazükogo.