US open tetsür asaya osang

New York, September 13 (Agencies): Tan US Open tetsür kija asayaba tarensen nung Flavia Pennetta-i taoba mapang takok ngua alila Roberta Vinci madak minute 93 nung 7-6 (7/4), 6-2 agi takok ngu Grand Slam mezüngbuba benogo. Iba asaya sülen la tennis asaya nungi anisüngzükogo.
Arishi küm 33 tain, Pennetta ya Grand Slam mezüng abener rongnung tantsütila kümogo.
“Iba takok ya ajanga küm pongmang asangsang nung atalokdaktsüogo,” ta Pennetta-i ashi.
Saka takok marok ngur mapang tatsükadang lir külen lai, iba takok tulu anguba den külemi ni tennis asaya nungi anisüngzüker, ta metetdaktsüogo.
Italy tsür la jakdang tetsür kija asaya nung takok angulaji Francesca Schiavone ang lir. La arishi küm 29 asüdang, 2010 French Open takok marok ngua liasü.
Pennetta-i takok anguba mapang Italy prime minister Matteo Renzi-ia repranga liasü.
Pennetta iba asaya akokba asoshi takok marok den senpet US sen million 3.3 nguogo.
Ano tetsür nisung anana asayaba nung Wimbledon champion Sania Mirza o Martina Hingis nati Casey Dellacqua o Yaroslava Shvedova na 6-3, 6-3 agi koka mezüng jenjang nung takok nguogo.
Iba asaya akokba sülen Mirza-i, “Taküm ya kena asoshi küm tajung ka lir,” ta ashi.
Wimbledon koker ang ano tang US open akokba ya jangratemtsüka lir, ta laisa ashi.