US Open: Williams, Federer aser Barty-i takok angu

New York, Luroi/August 29 (Agencies): Bodhbarnü US Open tetsür kija asaya nung Serena Williams tera agidang metsük aser kasa mapang nung Novak Djokovic tapu nung tashiba liaka takok nguogo aser Roger Federer-a asaya koka taruba round tongtetogo.
Iba asayamung nung seed 8buba nung alila Serena Williams-i arishi küm 17 tain US tsür 5-7, 6-3, 6-1 agi koka liasü.
McNally shiba Williams-i 1999 küm US Open mezüngbuba akokba mapang soa liasü lai mezüngbuba set nung Williams nem timtem aika agüja liasü saka US Open trokben tashi koker alila yagi tatembangbuba game 11 nungi 9 kokteta asaya kokogo.
“Ni taonungbo jenbuogo. Ni asayaba yimya dak temulung masür,” ta Williams-i ashi.
Djokovic, shibai taoba Slam pongu nungi pezü kokteta lir pa Argentina nunger asayar Juan Ignacio Londero 6-4, 7-6 (7/3), 6-1 agi akokba asaya nung tapu tabelen len tashiba alaiba ajanga timtema liasü. “Iba ajanga kü service aser backhand dak kongshia liasü,” ta Djokovic-i pa tapu yiruba indang ashi.
Kasa mapang nung Grand Slam 20 tashi koker alisang Federer-i Bosnia nunger asayar Damir Dzumhur 3-6, 6-2, 6-3, 6-4 agi kokogo.
Arishi küm 38 tain asayar ya mezüngbuba round nunga India nunger qualifier Sumit Nagal den asayaba mapa mezüngbuba set mekoki liasü.
“Aibelen aika menaba ya kanga tezüdangtsüka lir. Ni tejakleni atutsü atema tang dang nungi tajungba asayatsü nügdaker,” ta Federer-i ashi.
Kasa asayamung tetsür kija asaya nungsa French Open champion Ashleigh Barty-i America tsür Lauren Davis 6-2, 7-6 (7/2) agi kokogo.
Maneni Czech tsür Karolina Pliskova-i Georgia tsür qualifier Mariam Bolkvadze 6-1, 6-4 agikokogo aser Ukrainian tsür Elina Svitolina-i Grand Slam tenet tashi koker alila Venus Williams 6-4, 6-4 agi kokogo. Kasa asayamungsa ano Madison Keys-i China tsür Zhu Lin 6-4, 6-1 agi kokogo.