US & Pakistan tesendaktep akangshitsü renemer

Washington/Islamabad, Chiteni 31 (Agencies) : United States aser Pakistan tsüngda asentenshir tesendaktep akangshia bener aotsü atema US Defence Secretary James Mattis aser America nung aliba Islamabad Ambassador, Ali Jahangir nati mulunga renemogo, ta osang ka ajanga metetdaktsü.
US Defence Department headquarters, Pentagon nung Mattis o Jahangir na ajurutepa senden amenba mapang linük ana tsüngda tesendaktep atema shisalemsatep aser South Asia nung regional security indanga benoka jembiogo, ta Pakistan nungi adokba Express Tribune osangkaket ajanga sangdong.
Pakistan nung Chiteni/July 25 nü election agia cricketer aliba nungi yimtenren nung tetsüng ajemoka inyaksang, Imran Khan-i aniba Pakistan Tehreek-e-Insaf (PTI) teloki takok anguba sülen tang lennir ana tsüngda sendenji amen.
Washington nem kecha meyipa magütsür saka tiyazü jembia ashikülak maparen inyaker aserbo kiralongrartem kümzüka yua parnok jenokdaktsür, ta US Tir, Donald Trump-i Islamabad aitsüba sülen, taküm Aenjeti/Jan nungi Pakistan aser United States na tsüngda tesendaktep mokonga kümer liasü.