US rongtem den yariteptsü, Japan-i raraba rong yok

Tokyo, May 01 (Agencies) : Washington aser Pyongyang na tsüngda tensa mejungi kümer aliba mapang ka nung Hombarnü Japan-i parnok indang raradang amshiba rong tulutiba rongnung ka US rongtem yaritsü asoshi yokogo.
Japan indang Self Defence Forces’ destructor rong, Izumo nungi khen nung helicopter pungu tashi oli aruli südaktsüteter aser iba rong ya Tokyo anuolentip tsütsü Yokosuka navy tesep nungi Pacific leni ayamesogo, ta osangbenertemi ashi.
19,500-tonne taret rong yagi ita asem tashi jajatsü aliba US supply rong Shikoku asetkong tashi meina aotsü. Iba mission ya küm 70 nung mezüng takok anguba mission ka asütsü.
Izumo-i US rong nungittsü. Iba rong yagi US rong nem totzü aser tanga nüngdakbatem ajak agütsüba den nuclear tashi agi amshiba aircraft carrier, USS Carl Vinson aser amakdang amshiba rong telok tem den yariteptsü.
Pyongyang-i missile maneni tendangba ajanga aser parnoki ano nuclear trokbuba tendangtsü tsübua bilemba agi Washington-i Korea Peninsula leni parnok indang raraba rongtem yok.
Pyongyang-i tan tesüsa Honibarnü missile ka tendangogo aser iba kasa anogo nung US carrier-a Sea of Japan tonga Japan aser South Korea na den military drill agia liasü.
1945 küm World War II anenba sülen teloktep linük ka yaritsü asoshi Japan-i tan rong, Izumo yokbaji mezüngbuba asütsü.
Iba inyakyim ajanga Japan temzüng kübok arrla 9 nem tetetzü tasen ka agütsür. Linük nung Ato Kilonser Shinzo Abe-i anir lokteper inyakba mapa pusemer aser par sepaitemi tebielmba tajung aketba tanga linük sepaitem yaritsü jangrar.
Tesüiba mapang nungbo Japan security ji pei tesemi lendong arudang nokdangtsü atema dang inyakaba telok liasü.