US-Russia nati benokba yimjung tezüngzüktep agitsü onük agizüker: Syria

Syria’er Democratic Forces züngsemtemi tongpang nung amshitsü prangpong bener Syria kübok Hasaka nung tentetba al-Shadadi jila tezülen ajangdanga aoba noksa ka yangi angur. (Al-Shadadi, February 23)

 Damascus, February 23 (Agencies): United States aser Russia nati tan Honibar nü nungi tenzüka mapa küma benshitsü asoshi benokba yimjung tezüngzüktep agizüktsü mulungba olen ka Syria sorkari tanü, Mongolbar nü metetdaktsüogo.

Ajisüaka, par sorkar mitkartemi Islamic State (IS) kiralongrar telok aser al-Qaeda telungpur telok den sentaktepa aliba teloktem anemabo maneni tongpang raratsü renemba osang ka Syria sorkari metetdaktsü.

US o Russia nati tan benokba yimjung tezüngzüktep agitsü teloktem rong nung IS aser al-Qaeda telungpur telok den sentaktepba teloktem densema mali aser tanüngba Syria sorkar anemertemi iba yimjung tezüngzüktep agizüktsü mesüra magizüktsü asoshi agiba telemtetba tan Hokolbar nü tashi nung metetdaktsüsü renema lir.

Syria sorkar aser par pusemba Russia mitkartemi sorkar anemertemi agiba aliba tesemtem tanaben agishitsü merangba, nungdakbapur nem teyari osettsüset agütsütsü maparen nokdangba aser nüburtem aliba tesemtem nung bomb-tem tsükdakja lendong atalokdaktsüba maparen ajunga anenra, par teloki tan benokba yimjung tezüngzüktep agitsü mulungba olen ka Syria sorkar anemer rong nung tongti telok, High Negotiations Committee (HNC)-ia metetdaktsüogo.

Tan benokba tezüngzüktep agir teloktemi tongpang rarabaren anenba den külemi, timtem toushi ajurua aliba nüburtem nem chiyongtsü aser mozü mora densema, tang rongdaka nungdakba osettsüsettem agütsütsü maparen menokdangtsü asoshi US o Russia nati metetdakja lir.

US o Russia na lenisüba kübok alima linük 17 densemba International Syria Support Group (ISSG)-i Syria nung yimji yimjung lidaktsütsü asoshi mapatong tulu tenzüka lir.

“Tarutsü anogotem nung ozü teloki Syria nung yimji yimjung lidaktsütsü maparen balala tenzüka inyaktsü aser iba mapatong nung ozü telok den amaliteptsü asoshi Syria sorkar, sorkar anemer aser Syria nung adokba mangatettepbaren den sentaktepa alir ajunga ajungshir,” ta US Secretary of State, John Kerry-i metetdaktsü.

US Tir, Barack Obama aser Russia Tir, Vladimir Putin natia yashi, Hombar nü telephone ajanga Syria nung yimji yimjung lidaktsütsü onük benoka jembiba osang ka White House-ia metetdaktsüogo.