US: San Diego police ketdangser 1 kaset; 1 yirutsü

San Diego, July 29 (Agencies): US kübok San Diego yimti nung police ketdangser 1 kasetba aser ketdangser tanga 1 kanga mejungi tanep, Hokolbar anepdang yirutsüba osang ka San Diego police lenila,  Shelley Zimmerman-i metetdaktsüogo.
San Diego kübok kiyong ka nung anener alidang police ketdangser ana jagi lendong ajuruba osang angazükogo.
Tenati lendong ajuruba osang angazükba sülen külem police ketdangsertem lendong atalokdaki arisanga ao aser police ketdangser ana dakji injang kaloktsür aliba ngua, tenaji police gari nung anioker mozüki bushia ao saka tena rong nung kabo süadok.
“Ozü ketdangser aser doctor-temi kanga merang taküm kümzüktsü merang saka tanü lendong ajurur rong nung ketdangser kabo süadokba osang sasaseta lemsateper,” ta Zimmerman-i tanü osangbener dang metetdaktsü.
Taoba hopta ishika tsüngda nung Dallas aser Baton Rouge na densema, US kübok tentetba yimti balala nung police ketdangsertem amakba sülen US ajunga nung police ketdangsertem kanga dang kümdangshia aliba osang bushitetogo.
Tan amakba lendong atalokdaktsür asütsü akok ta temulung melemi bilemba Spanish oshi jembir nisung ka police-i pua aliba osang ka Zimmerman-isa metetdaktsü.
Ano külen, tan lendong nung yiruba police ketdangser dak operation agiba sülen tang pa taküm tia tajungba aliba osang ka San Diego Police Department-ia metetdaktsüogo.