US Secretary of State, John Kerry-i Abu Dhabi semdang

Abu Dhabi, November 23 (Agencies): US Secretary of State, John Kerry-i United Arab Emirates (UAE) linük semdanga par lenisang, Crown Prince Sheikh Mohammed Bin Zayed Al Nahyan den tanü Hombar nü ajurutepogo.
Syria nung mangatettep ken o tulu adoka tongpang kanga sashia rarabaren anentsütsü den sentakba onük benoka jembitsü nükjidong nung Kerry-i tan UAE linük ya semdanger lir.
European Union (EU) aser United Nations (UN) na den külemi densema Syria nung mangatettep adokba telok rong nung yimjung tezüngzüktep agia par linük nung yimji yimjung tia bener arutsütsü asoshi apusoba linüktem rong nung UAE linüka densema lir.
Taoba mapang, 2011 küm March ita nungi tenzüka Syria Tir, Bashar al-Assad-i aniba sorkar aser sorkar anemer na tsüngda mangatettep ken o adoka tongpang kanga sashia raraba ajanga tanü tashi nung ishiba agi niung 250,000 shi asüba osang bushiteta lir.
UAE densema alima linük lenirtemi Austria yimtiba, Vienna nung tan November ita 13 nü tesüsa senden amenba sülen Syria sorkar aser sorkar anemer na tsüngda yimjung tezüngzüktep agitsü ajungshitsü asoshi UN nem mapa nungloktsüogo.
Alima linüktemi yaküm 2014 küm tetenzüklena Syria den sentakba senden 2 tashi amen saka item senden nung shilem agirtemi temelenshi balaka bener marutsüteti süidaktsü.
Ano külen, küm 1 shi nung tan mezüng semdanga, Kerry-i tan UAE semdangba sülen Israel linüka semdanga par Ato Kilonser, Benjamin Netanyahu den ajurutepba den külemi, pai Palestine lenisang, Mahmoud Abbas dena ajurutepa senden amentsü sentong renema lir.