US Secretary of State, John Kerry-i Ukraine semdanger

Kiev, July 07 (Agencies): US Secretary of State, John Kerry-i Ukraine tanü, Brehostibar nü semdangogo.
Russia den adokba ali lushi aser arrtsü den sentakba mangatettep ken o nung par US-i taoba mapang Soviet Union nung densemba Ukraine linük maneni nungittsü renemba osang sangoktsütsü nükjidong nung Kerry-i tan Ukraine semdanger lir.
Kerry-i Georgia linük semdanga par linük ana tsüngda mitkar amalitep alitsü tezüngzüktep zülutepba yashi, Bodbar nü agiba sülen pai tanü Kiev tonga ao.
Russia-i par mitkar tashi kanga sashia amshiba anguba sülen Georgia aser Ukraine linüki tebilemtsü khuret benoka, European Union (EU) aser North Atlantic Treaty Organization (NATO) nung züngsemtsü merangba densema, West den tesendaktep junga yanglutsü tenzüka lir.
Kerry-i tanü Kiev yimtiba tonga aoba sülen Ukraine Tir, Petro Poroshenko aser pai aniba Ukraine lenirtem den ajurutepa senden amenba osang angazükogo.
Parnoki tanü senden nung Ukraine sorkar aser Russia-i pusema nungitba Ukraine sorkar anemer na tsüngda taküm February ita Minsk nung agiba yimjung tezüngzüktep den sentakba onük benoka liasü.
Ano külen, US Tir, Barack Obama aser Russia lenisang, Vladimir Putin natia yashi telephone ajanga jembidang Minsk yimjung tezüngzüktep takok ngudaktsütsü onük benokba osang angazükogo.